Jácome sitúa ao Entroido 2024 de Ourense no "top ten de entroidos do planeta"

O alcalde de Ourense, Gonzalo Pérez Jácome, asegurou que o Entroido da cidade este ao foi "o mellor da historia" e situouno en "top ten de entroidos do planeta".

"O medible non é opinable e os parámetros de participación son os que son", manifestou Pérez Jácome durante unha valoración das festas, aludindo a que "se bateron todas as marcas" en canto a número de asistencia, tanto nocturna, "especialmente o luns á noite porque o tempo foi extraordinario", como "no tardeo" e na sesión infantil, ademais do desfile, que "foi multitudinario".

O alcalde destacou que o luns noite foi "o pico da movida nocturna" da cidade con cheos no "catro puntos quentes" do casco antigo: na Alameda, con 8.000 asistentes, na Praza Maior, con 3.000, na Praza de Santa Eufemia, con 2.000 e no Corrixidor, con 1.000 persoas. Ademais de "máis de 10.000 persoas" entre outras prazas e rúas adxacentes e o enclave de Frei Canedo.

Na mesma liña, asegurou que, desde o Xoves de Comadres, coa Praza Maior chea, ata este mércores de cinza, toda a rúa do Paseo "estivo abarrotada" e ademais "introduciuse o tardeo con miles de persoas bailando con música en vivo". A isto sumou o "éxito total" dos entroidos de Frei Canedo, así como o de Eiroás e Seixalbo.

"Púidose ver que o entroido de Ourense xa se relaciona co de Tenerife e co de Cádiz. Sen dúbida é o gran referente da metade norte de España", garantiu o alcalde da cidade das Burgas, que a continuación engadiu que, ademais de ser "un super Entroido da capital", "está reforzado" por todos os Entroidos da provincia. Con iso, dixo, "está claro que a nosa terra é un auténtico epicentro o entroido e, sen dúbida, está tamén no top ten de entroidos do planeta".

Gonzalo Pérez Jácome participa nunha parodia do proxecto de parque acuático para Ourense, durante un desfile de Entroido | Fonte: Arquivo.