Rego (BNG): "O BNG é unha forza nacionalista, soberanista de esquerdas.. e conseguiu o 31% dos votos"

O deputado do BNG no Congreso, Néstor Rego, dixo que o seu partido "non ten teito" e augurou que ten posibilidade de "seguir crecendo" como alternativa ao PP, despois que nas eleccións deste domingo obtivesen o seu mellor resultado histórico con 25 escanos no Parlamento de Galicia.

Rego, que non participou activamente na campaña de Ana Pontón, destacou que "hoxe hai unha alternativa ao PP máis forte da que había antes destas eleccións, e por tanto temos un horizonte claro". Nunha entrevista en RNE, recollida por Europa Press, na que sostivo que "o BNG non ten teito" e que seguirán traballando para continuar crecendo.

Segundo o deputado da formación nacionalista galega, o BNG é unha forza nacionalista, soberanista de esquerdas e "decididamente antiimperialista", e a pesar de que "todo o mundo" coñece esa posición política, o seu partido conseguiu o apoio de máis do 31 por cento dos galegos, con case medio millón de votos.

Neste sentido, augurou que o BNG traballará por "ampliar a súa base social e electoral" e seguir crecendo como alternativa do PP en Galicia, aínda que sen "renunciar" aos seus "postulados políticos", como veñen facendo "desde sempre e especialmente nos últimos tempos".

"Sabemos que hai persoas que non eran votantes habituais do BNG e que, nesta ocasión, apostaron por unha forza política na que vían esa posibilidade de articular un cambio de rumbo", proseguiu Rego, manifestando a "absoluta certeza" de que o seu partido non defraudará aos seus votantes.