Morre un home de 80 anos nunha colisión frontal entre dous vehículos en Carballeda de Avia

Un home de 80 anos morreu na mañá deste xoves nunha colisión frontal entre dous vehículos rexistrada no municipio ourensán de Carballeda de Avia. O falecido manexaba un turismo de marca Renault que impactou ás 10,30 horas no quilómetro 3 da estrada OU-0306 contra un Citröen no que viaxaban dúas persoas que resultaron ilesas.

Segundo a información facilitada pola Garda Civil de Ourense, a vítima mortal, que se atopaba soa no vehículo, non levaba abrochado o cinto de seguridade. O falecido é un veciño de Carballeda de Avia de 80 anos de idade. Á zona desprazáronse membros da unidade de investigación da Garda Civil de Ourense para redactar as dilixencias do sinistro.

A voz de aviso deuna ao 112 o ocupante do outro coche implicado, que pedía axuda sanitaria urxente. Desprazados ao momento, os profesionais de Urxencias Sanitarias 061 só puideron certificar a morte do condutor. O accidente afectou á circulación na zona mentres duraron os traballos dos servizos de emerxencia e dos efectivos de mantemento da vía, que concluíron as súas tarefas ao fío do mediodía.