Diego Calvo denuncia os "incumprimentos" do PSOE e acúsao de "diferenciar" entre comunidades
O presidente provincial do PP da Coruña afeou os sucesivos retrasos na chegada dos trens Avril, a deterioración da A-6 e as dificultades á lei galega do litoral.
Por Europa Press / Redacción | SANTIAGO DE COMPOSTELA | 03/03/2024 | Actualizada ás 16:43
O presidente provincial do PP da Coruña, Diego Calvo, denunciou a forma de traballar do PSOE e acusouno de "diferenciar" ás comunidades autónomas. Así o declarou este domingo durante a súa intervención nun acto da Ruta pola Igualdade do Partido Popular, que se celebrou na Coruña, no que tamén participou o portavoz dos populares no Congreso, Miguel Tellado."Esta forma de traballar deixou exemplos que creo que é necesario denunciar, que todos sexamos conscientes de que esa maneira de gobernar non é a que queren os cidadáns", incidiu.
Diego Calvo enumerou os "incumprimentos" dos socialistas en materias como a alta velocidade, a deterioración da A-6 e as dificultades á lei galega do litoral. Desta forma, cargou contra o ministro de Transportes e Mobilidade Sustentable, Óscar Puente, que chegou a Vigo acompañado de "todos os cargos socialistas e dos Reis Magos" para anunciar a chegada dos trens Avril. "Eu non sei que lle pediron na carta. Está claro que a ese Ministerio lle trouxeron carbón, visto o visto nas últimas semanas, e o cargamento era moi grande, pero a Galicia o único que seguiron traendo foron mentiras", lamentou.
A continuación, afeou que "hai anos" que prometen que vai chegar o AVE ao resto das cidades. "Preguntámonos se isto ocorrería se foran a Cataluña, aínda que xa teñen o AVE desde o ano 92 coas olimpíadas", continuou, á vez que volveu a afear a diferenza con outros territorios de España.
FIRME DA A-6
Tamén fixo referencia á conexión ferroviaria de Galicia con Portugal, á calidade do firme da A-6 que é "incriblemente mala" e cualificou esa deterioración como "un atentado á seguridade".
"Levamos denunciado desde hai meses pedindo que renoven a capa de asfalto da A-6 e non nos fan caso. Estou seguro que isto non ocorrería se dependese dalgún voto nacionalista radical independentista o goberno de Pedro Sánchez, estou seguro de que trataría ás comunidades de maneira igual", esgrimiu.
