Os galegos gastaron un 41% menos esta semana Santa respecto ao ano pasado
Durante case toda a semana fixo moi mal tempo.
Por Europa Press / Redacción | SANTIAGO DE COMPOSTELA | 12/04/2024 | Actualizada ás 10:22
O gasto medio dos galegos nas vacacións de Semana Santa foi de 185 euros, un 41% menos que en 2023, cando alcanzara os 313 euros, segundo un estudo do Observatorio Cetelem, que sitúa o desembolso medio nacional nese período en 260 euros. Unha baixada de ingresos que coincide cunha semana santa na que houbo moi mal tempo.
Segundo este estudo, diminúe a porcentaxe de galegos que afirma gastar menos que no ano anterior, cun 33% das mencións fronte ao 35% de 2023. Por contra, aumenta o daqueles que realizaron o mesmo desembolso, cun 54% fronte ao 50% de 2023, e diminúe a porcentaxe de quen aumentaron o gasto, cun 13% das mencións, fronte ao 15% do ano anterior.
O estudo, realizado a partir de mil enquisas en todo o Estado entre maiores de 18 anos, sinala que descansar e quedar con amigos foi a opción preferida entre os galegos nas vacacións de Semana Santa, cun 65% das mencións, fronte ao 50% do ano anterior.
Séguelle un 47% que declara saír de restaurantes, fronte ao 33% de 2023; e un 22% que afirma haber ido de compras, fronte ao 23% do ano anterior.
MENOS VIAXES
Rexístrase tamén un descenso na porcentaxe de galegos que declara viaxar durante esta semana Santa, ao pasar dun 25% en 2023 a un 18% este ano. Un 59% dos galegos enquisados que viaxou nas vacacións de Semana Santa foi a zonas rurais dentro de España. Séguelle a opción de viaxar a zonas de praia dentro de España, cun 18% das mencións, e un 12% que viaxou fóra de España.
Cetelem é especialista en crédito ao consumo, préstamos persoais e xestión de cartóns. Opera en España desde 1988, onde conta actualmente con máis de 1.500 empregados e 3,5 millóns de clientes.
