O alixo de cocaína do MV Karar volve a xuízo tras dous adiamentos: será xulgada desta a organización de Santórum?

O alixo de 3,8 toneladas de cocaína, transportadas en plena pandemia polo buque MV Karar, volverá a xuízo este 17 de abril, despois de dous adiamentos, e tras un aviso da Audiencia Provincial de Pontevedra a varios acusados, que non se presentaron á última vista sinalada, en marzo pasado. O pasado 20 de marzo, a Audiencia Provincial acordou aprazar o xuízo contra 28 acusados por ese alixo (un dos investigados faleceu durante a instrución da causa), membros dunha organización supostamente liderada por Juan Carlos Santórum, debido á baixa dunha letrada da defensa, e despois de que o xefe da organización nin outros seis acusados máis se presentasen.

A sala fixou como nova data de xuízo o 17 de abril e a maxistrada presidenta advertiu de que os sete acusados que non comparecían ausentáronse de forma inxustificada, polo que serían voltos citar e apercibidos de que, se de novo se ausentaban sen xustificación, serían "conducidos pola forza pública". Nesa sesión de marzo compareceron 21 acusados, dos cales 16 permanecen en prisión preventiva. Así, están no cárcere 14 tripulantes do MV Karar, de Bangladesh e Nepal, e un cidadán colombiano, ademais dun galego que está en prisión por outro procedemento.

Non entanto, o 25 de abril cumpriranse catro anos desde que ingresaron no cárcere por esta causa os tripulantes do buque, e a lei non permite superar ese prazo de prisión preventiva, polo que, todo parece indicar que sairán en liberdade antes de que haxa unha sentenza por estes feitos. A de marzo foi a segunda suspensión deste xuízo, que xa estivo sinalado para febreiro, e que se aprazou "por diversas cuestións, entre elas, cambios de avogados", informaba entón o TSXG.

TRANSPORTE DE COCAÍNA EN PLENA PANDEMIA

A Fiscalía atribúe aos procesados a preparación, coordinación e transporte da droga, que foi intervida nunha abordaxe en altamar. As forzas de seguridade detiveron en abril de 2020 aos 15 tripulantes do MV Karar, un deles galego e o resto de Nepal e Bangladesh; e posteriormente a outras trece persoas en terra, entre quenes estaban un funcionario do Servizo de Vixilancia Aduaneira e a súa muller. O considerado xefe da organización, Santórum, deuse á fuga, pero entregouse meses despois para cumprir unha pena de algo máis de dous anos de cárcere nunha causa por revelación de segredos (filtración de información por parte de dous axentes da Garda Civil).

O ministerio público atribúe a todos os acusados un delito contra a saúde pública na modalidade de drogas que causan grave dano á saúde, co subtipo agravado polo uso de embarcacións e por tratarse dunha rede con contactos internacionais; e un delito de integración en organización criminal. A maiores, ao matrimonio acusado impútalles tamén un delito de branqueo de capitais, e a un procesado ao que lle interviñeron unha pistola, acúsao tamén de tenencia ilícita de armas.

PENAS SOLICITADAS

Para o xefe da organización, pide a pena de 18 anos e medio de prisión, así como unha multa de 438 millóns de euros; mentres que, para o resto, solicita 13 anos e medio de cárcere (dous anos máis para o investigado por tenencia de armas) e dúas multas de 400 millóns de euros. No caso do funcionario de Aduanas, a solicitude de pena increméntase noutros 6 anos polo branqueo e dúas penas de inhabilitación total por un período de 20 anos; para a súa muller, a Fiscalía tamén pide a pena de cárcere por branqueo, de maneira que ambos se enfrontan a un total de 19 anos e medio de prisión.

Parte do xuízo á organización de Santorum | Fonte: Salvador Sas - Efe