O sindicato de Enfermaría Satse baralla convocar unha folga e protestas no servizo de Cirurxía do CHUO

Satse, o principal sindicato de Enfermaría, baralla convocar "accións contundentes" de protesta e, mesmo, unha folga no servizo de Cirurxía do Complexo Hospitalario Universitario de Ourense (CHUO) pola "situación de inseguridade asistencial e laboral percibida" e que "se acrecentou nas últimas semanas".

En concreto, esta organización explica nun comunicado que a Xerencia da área Sanitaria e a dirección médica "deixaron de lado" aos enfermeiros ao implantar, "sen contar" con eles, unha nova forma de planificación das cirurxías. Trátase das "cirurxías deslizantes", unha medida que ao persoal de Enfermaría se lle comunicou "nos últimos días e case de forma casual". Esta dinámica permitirá prolongar --como xa se facía anteriormente, aínda que era de forma esporádica-- a actividade cirúrxica ata as 19.00 horas.

É unha decisión, asegura Satse, adoptada "sen comunicación nin acordo co persoal, excepto o colectivo médico", e "sen ningunha marxe de negociación nin sequera información previa". O sindicato cre que é un "desprezo" ao persoal de Enfermaría, que é "imprescindible" durante as cirurxías.

Neste contexto, tras trasladar estes problemas á dirección, Satse baralla convocar protestas, paros ou, mesmo, folgas no citado servizo do CHUO.

Persoal sanitario atendendo un paciente con coronavirus nunha sala da UCI dun hospital | Fonte: Médicos e enfermeiros - Arquivo