Dúas persoas resultan feridas tras unha colisión entre dous vehículos en Bergondo

Dúas persoas resultaron feridas este luns tras producirse unha colisión entre dous vehículos no concello coruñés de Bergondo, segundo informaron fontes municipais. O sinistro ocorría pola tarde, na estrada DP-0810 fronte a Vila Julia, "un punto negro de tráfico" en Bergondo. Alí chocaron frontalmente dous coches na zona na que se estreita a calzada.

Como resultado, os dous ocupantes dun dos vehículos, o que circulaba en dirección a Guísamo, resultaron "feridos con prognóstico reservado", e foron trasladados ao hospital San Rafael. Ata o lugar do sinistro desprazáronse efectivos do 061, Garda Civil e Protección Civil.

A alcaldesa de Bergondo, Alejandra Pérez, sinalou que a Deputación, tras o informe emitido polo Servizo de Patrimonio da Xunta de Galicia no que indica que todos os elementos de Vila Julia afectados polo retranqueo (necesario para ampliar a calzada) deben ser documentados de forma específica, volveu a solicitar ao propietario que permita a entrada aos técnicos provinciais para solicitar os datos topográficos necesarios. "Espero que, dunha vez por todas, teña a decencia de facilitar a redacción do proxecto. Non podemos esperar a que haxa outra vítima", sentenciou.

Accidente en Bergondo, á altura de Vila Julia, a 13 de maio de 2024.. CONCELLO DE BERGONDO | Fonte: Europa Press