O PSdeG promove unha declaración institucional en Galicia para condenar "os insultos" de Milei contra Sánchez
O PP lamenta que non o trasladen aos grupos antes de comunicalo en rolda de prensa e o BNG empraza a coñecer o texto. Rueda teme polos galegos na Arxentina e urxe "desescalar" a tensión.
Por Europa Press / Redacción | SANTIAGO DE COMPOSTELA | 21/05/2024 | Actualizada ás 16:08
O Grupo Socialista na Cámara galega quere que o Pazo do Hórreo aprobe no próximo pleno unha declaración institucional de condena ás palabras do presidente arxentino, Javier Milei, sobre o seu homólogo español, Pedro Sánchez. Así o avanzou a viceportavoz do PSdeG, Elena Espinosa, na rolda de prensa posterior á xunta de portavoces celebrada este martes no Parlamento de Galicia, onde a socialista convidou ao resto de grupos a unirse á censura contra "as insultantes manifestacións" de Milei.
Espinosa incidiu en que as palabras de Milei sobre Sánchez e a súa esposa, Begoña Gómez, constitúen un asunto "moi grave" que, ademais, considera que pon de manifesto a falta de "lealdade" do PP e "o resto de forzas de dereita" por situarse ao lado do presidente arxentina. A exministra trasladou a "profunda decepción" dos socialistas coa "postura" asumida polo PP e, segundo Espinosa, reproducida en Galicia polo presidente da Xunta, Alfonso Rueda, a quen instou a aclarar se segue "instrucións" de Xénova ou actúa por "criterio propio", xa que, se é isto último, "non pensa nos galegos que viven en Arxentina ou os que teñen intereses alí".
"Non todos somos iguais, non todos defendemos o país e non todos reaccionamos igual ante situacións idénticas", aseverou tras lembrar que o expresidente José Luís Rodríguez Zapatero "si defendeu" ao seu predecesor José María Aznar cando foi atacado publicamente polo presidente venezolano Hugo Chávez durante un foro internacional. Así as cousas, Espinosa subliñou que Rueda debería condenar as palabras de Milei e abandonar a "actitude condescendente" porque "non se poden esquecer as lealdades que se deben ter cando hai ataques de terceiros".
CRÍTICAS DO PP
Na súa quenda de comparecencia ante os xornalistas, o portavoz parlamentario do PP galego, Alberto Pazos Couñago, lamentou que o Partido Socialista fixese pública a súa intención de acordar esta declaración institucional nunha rolda de prensa antes de trasladarllo aos grupos ou comunicalo na propia reunión da xunta de portavoces. "Non me parece actuar con demasiada lealdade parlamentaria", sinalou Pazos Couñago, que cre que "non é a mellor forma de buscar consensos", aínda que compartiu que, ao seu xuízo, as esposas e familiares de políticos "en ningunha ocasión" deberían ser empregados e o debate público ou recibir "insultos".
En todo caso, mostrou os seus receos acerca de que o PSdeG apele "a pensar nos galegos" cando membros do partido "insinuaban sobre o consumo de estupefacientes" por parte de Milei nun momento no que Rueda se atopaba de viaxe institucional en Arxentina para "defender os intereses" de Galicia no país austral. Así as cousas, criticou a forma de proceder do Goberno central sobre a crise aberta co Executivo arxentino, pois, para Pazos, estase trando de usar "a diplomacia" para a "confrontación" en busca de "réditos electorais".
O BNG DESCOÑECE PROPOSTA
Pola súa banda, a viceportavoz parlamentaria do BNG, Olalla Rodil, apuntou que os socialistas tampouco lles trasladaron unha proposta para esta declaración institucional, da que tamén tiveron coñecemento na comparecencia ante os xornalistas de Espinosa. Deste xeito, Rodil emprazou a que os socialistas remitan a súa proposta para emitir a súa posición respecto diso.
RUEDA URXE "DESESCALAR" A TENSIÓN
Así mesmo, o presidente da Xunta, Alfonso Rueda, admitiu este martes preocupación polos efectos que poida ter na cidadanía galega e nas empresas vinculadas coa Comunidade o que definiu como unha "irresponsable guerra de declaracións" entre os gobernos de España e Arxentina. "Os galegos de Arxentina e as empresas que traballan alí non poden ser vítimas dunha irresponsable guerra de declaracións", advertiu o mandatario autonómico.
E é que Galicia ten á súa maior comunidade de residentes no exterior neste país. Unha conxuntura na que Rueda optou por pronunciarse en redes sociais e, acompañando á noticia do anuncio da retirada da embaixadora, optou por reivindicar que se necesita "serenidade e certezas" para liquidar a situación. "Necesítanse serenidade e certezas, e iso pasa por desescalar unha situación que non leva a ningunha parte", sentenciou.
