Menos eventualidade e recoñecer o solape de xornada, principais reclamacións de Satse ao conselleiro de Sanidade

Representantes do sindicato de enfermaría Satse mantiveron o mércores unha reunión co conselleiro de Sanidade, Antonio Gómez Caamaño, e o seu equipo para trasladarlle as súas principais reivindicacións, entre as cales están unha redución da eventualidade na profesión e o recoñecemento do solape de xornada como tempo traballado.

Ademais, segundo informa o sindicato a través dun comunicado, o conselleiro comprometeuse a axilizar a finalización do concurso-oposición de enfermaría, "a piques de cumprirse un ano" da celebración das probas. No que respecta á eventualidade, Satse sinalou a necesidade de acometer unha diminución fomentando a contratación de longa duración e a optimización dos contratos de continuidade existentes.

Ademais, o sindicato afea que Galicia "é unha das catro autonomías que aínda non" recoñecen o solape de xornada, é dicir, o tempo que as enfermeiras empregan entre unhas quendas e outras para que o profesional que entra a traballar estea ao tanto das novidades sobre os pacientes.

Outro asunto que Satse puxo enriba da mesa é un plan de continxencia en previsión de que se produza un déficit de profesionais de enfermaría, así como a necesidade de aumentar prazas deste oficio nas universidades. O sindicato tamén reclamou a continuidade dos equipos de atención domiciliaria ata decembro de 2025 e a reclasificación profesional de enfermeiros e fisioterapeutas no grupo A de emprego público.

Finalmente, no tocante aos fisioterapeutas, Satse reclamou máis persoal para que a sanidade pública galega se achegue aos cocientes da Organización Mundial da Saúde (OMS), situada nun por cada 1.000 habitantes, e potenciar o seu papel na atención primaria cunha carteira de servizos propia.

O conselleiro de Sanidade, Antonio Gómez Caamaño, reúnese con representantes do sindicato Satse | Fonte: SATSE