Comezan a enviarse os SMS para reforzar a vacinación fronte ao neumococo de 15.000 bebés nados en 2022
Sanidade administrará agora unha vacina 20-valente, que inclúe novos serotipos e achega unha protección catro veces maior.
Por Europa Press / Redacción | Santiago de Compostela | 27/05/2024 | Actualizada ás 13:48
A Dirección Xeral de Saúde Pública empezou este luns a enviar SMS informativos ás familias para vacinar fronte á enfermidade neumocócica aos bebés que, nacidos en 2022, xa cumpriron os dous anos de idade. Diso informou a Consellería de Sanidade nun comunicado, no que explica que inicia unha campaña de captación para mellorar a inmunización de 14.850 menores que, a pesar de que xa foron inmunizados cunha vacina 13-valente, agora poden reforzar a súa protección cunha vacina que inclúe 20 serotipos.
Deste xeito, a modificación no calendario de vacinación infantil fronte ao neumococo e a incorporación de 7 serotipos adicionais achegará unha protección catro veces maior. Desde este luns, os proxenitores dos nenos e nenas nacidos en 2022 e cos 2 anos cumpridos, poden pedir cita a través do seu centro de saúde ou da aplicación Sergas Móbil. Calquera familia que se atope neste caso e que non reciba a mensaxe, pode solicitar máis información no seu centro de saúde.
Aqueles bebés que aínda non cumpriron esta idade, recibirán a súa vacina na revisión pediátrica dos dous anos. Esta campaña da Dirección Xeral de Saúde Pública persegue un dobre obxectivo, por unha banda, incrementar a protección directa de nenas e nenos fronte á enfermidade e, dunha maneira indirecta, tamén protexer a poboación non vacinada, dado que os bebés son altos transmisores.
O seguimento epidemiolóxico desta enfermidade constatou que, no período 2019 a 2023, o maior número de casos de enfermidade neumocócica invasora, na poboación pediátrica, rexistrouse en menores dun ano e, a continuación, dos de 1 e 2 anos de idade. En concreto, durante o pasado ano a incidencia no grupo de menores de 2 anos foi de 3,4 casos por 100.000 habitantes.
A Consellería de Sanidade destina unha partida que supera os 11 millóns de euros ás vacinas que protexen fronte á meninxite. Ademais, o investimento completo da Xunta ao Programa Galego de Vacinación achégase aos 40 millóns de euros, e mantén a Galicia co calendario de inmunización universal e gratuíto máis completo do mundo.
