O BNG planta a Zelenski no Congreso por desacordo coa axuda militar a Ucraína
Néstor Rego, deputado do BNG, lamentou que esteamos "instalados no paroxismo do militarismo, máis 1.129 millóns de euros para alimentar á máquina de guerra".
Por Europa Press / Redacción | Santiago de Compostela | 27/05/2024 | Actualizada ás 20:27
O BNG, Esquerra (ERC), Bildu e Podemos declinaron acudir este luns ao encontro no Congreso co presidente de Ucraína, Volodímir Zelenski, con motivo da súa visita oficial a España. Estes partidos, socios habituais do Goberno de coalición, discrepan do envío de axuda militar a Kiev. O dirixente ucraíno chegou á Cámara Baixa ao redor do cinco e cuarto da tarde e alí foi recibido pola presidenta do Congreso, Francina Armengol, e polo presidente do Senado, Pedro Rollán, para posteriormente dirixirse ao Salón de Pasos Perdidos para asinar no Libro de Honra. "A memoria de que o pobo de España está de xeito conxunto connosco nestes momentos treboentos gravarase na conciencia das xeracións de ucraínos de hoxe e mañá", deixou escrito Zelenski.
Durante a visita, que durou preto dunha hora, o dirixente ucraíno visitou o hemiciclo acompañado dos presidentes das Cámaras e as súas respectivas delegacións. Entre os asistentes atopábase tamén o embaixador de Ucraína en España, Serhii Pohoreltsev. Tras isto, Zelenski reuniuse cos portavoces dos grupos parlamentarios tanto do Congreso e como do Senado, pero non acudiron todos. Estiveron presentes os representantes do PP, PSOE, Vox, Sumar, Coalición Canaria e Junts, mentres que desde ERC, Bildu, Podemos e BNG declinaron acudir á cita. Estas formacións enmarcan a súa ausencia en rexeitamento pola decisión do presidente do Goberno, Pedro Sánchez, de insistir na axuda militar a Ucraína, agora cun acordo para doar estes anos máis de mil millóns de euros destinados a armamento.
"Aumentar o gasto militar ás costas do Congreso só beneficia ás grandes potencias e aos intereses da industria armamentística. Reforzar a vía bélica e o envío de armas só logrará prolongar a guerra. A solución virá por vías diplomáticas e pacíficas, sempre", afeou o portavoz de Bildu, Oskar Matute a través da súa conta de X. Unha liña moi similar á expresada pola líder 'morada' Ione Belarra, quen considera que a visita de Zelenski á Cámara Baixa tratábase dun "lavado de face" á decisión "antidemocrática" de Sánchez. Así mesmo o deputado do BNG, Néstor Rego, a través de X lamentou que esteamos "instalados no paroxismo do militarismo, máis 1.129 millóns de euros para alimentar a máquina de guerra". "Teñamos claro que cada un deses euros descóntase do gasto social: educación, sanidade, emprego, vivenda. Non co apoio do BNG. Non participamos. Seguimos apostando pola paz", reivindicou.
