Os Poetarras, acusados de “proetarras” por denunciar a amizade de Feijóo cun narco

“El vai con Marcial Dorado nun barco; amigo dun narco

o neno da aldea

con déficit de formación

Vaite

que as túas amizades non son d'Os Peares

están en Madrid, Feijóo”. 

Esta é parte da letra de “Feijóo”, adaptación do tema "Roar", de Katy Perry, que realizaron Manuel Gago, Rubén Lino e Daniel Vilaverde, nun vídeo realizado por Pablo Lamosa que xa leva máis de 52.000 visións en Youtube.

Na letra desta versión, o presidente galego é o protagonista, o centro dun tema no que se fala do seu famoso “Tis che tein”, do decreto do galego ou da súa amizade con Marcial Dorado. E, precisamente, este foi un dos temas que os puxeron no punto de mira do PPdeG.

Por iso, acaban de ser acusados de “proetarras” por Novas Xeracións, as xuventudes populaes, que denuncian que foron contratados por Galiza Nova para unha festa celebrada o pasado sábado en Pontevedra. Por iso, pídenlle "responsabilidade ao secretario de organización de Galiza Nova, o concelleiro Alberto Oubiña, que debe respecto a todos os veciños, máis aló dos seus curiosos gustos musicais". 

“Concertos deste tipo non deben repetirse en espazos públicos", denuncia Novas Xeracións que acusa ao BNG de financiamento encuberto por, supostamente, utilizar unha subvención de 600 euros do Concello de Pontevedra para pagarlle a este grupo que o único que ten de “proetarra” son as sete letras coincidentes procedentes da verba "poeta", menos o 'r'.

Este grupo é moi coñecido polo virulento do seu sentido do humor. Fixeronse coñecidos por unha pequena historia audiovisual en galego producido para a Internet que gañou o festival Carballo Interplay.