Por Galicia Confidencial | Vigo | 01/12/2015 | Actualizada ás 14:12
A maior cidade de Galicia queda sen Plan Xeral de Ordenación Municipal, segundo unha sentencia do Tribunal Supremo. O alcalde olívico comprometeu hoxe tratar de solucionar o problema o antes posíbel. A sentencia ameaza con limitar o desenvolvemento urbanístico da cidade pero Caballero comprometeu que “na miña cidade o resolvemos todo”.
Abel Caballero culpa a Xunta da sucedido por realizar un “trámite indebido”. En concreto, o edil recorda que foi o Goberno Galego quen autorizou o PXOM en 2008 sen requirir o preceptivo plan de avaliación ambiental estratéxica.
En 2008 a consellería responsábel da política urbanística era María José Caride. A militante socialista é precisamente hoxe a concelleira de Urbanismo no goberno de Caballero. O alcalde convocou aos medios para dar máis explicacións. O líder socialista comparecerá as 17 horas deste martes.
A denuncia inicial púxoa Alternativa Veciñal de Vigo. O Tribunal Superior de Xustiza de Galicia desbotouna. O Supremo agora estímaa declarando nulo o PXOM.
A oposición non tardou en pedir responsabilidades. “Caballero debe dimitir e pedir perdón”, proclama Elena Muñoz. A ex-conselleira do PP argumenta que Caballero e Caride son os causantes da lea, polo que non terían lexitimade para arranxar o problema.
Dende a Marea de Vigo, sinálase que “hai responsabilidades políticas nesta anulación pois a conselleira da Xunta naquel momento era a actual concelleira de urbanismo”. A coalición de esquerda pedirá a comparecencia de Caride para explicar as consecuencias desta anulación.
“O alcalde Abel Caballero foi o que presionou á Xunta para a aprobación deste plan”, argumentou o edil Rubén Pérez hoxe en rolda de prensa. Na súa opinión, saltarse o estudo ambiental foi algo premeditado. A Marea de Vigo levaba no seu programa a redacción dun novo proxecto.
A Confederación de Empresarios de Pontevedra xa prepara unha reunión para abordar este tema, que afecta non só a vivendas, senón a numerosos sectores económicos da cidade olívica.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.