Galicia leva o seu modelo de xestión de pesca, acuicultura, control e rastrexabilidade de alimentos mariños a Serbia

O director xeral de Pesca, Acuicultura e Innovación Tecnolóxica, Antonio Basanta, desprazouse ata Belgrado (Serbia) como parte da delegación española liderada pola Secretaría Xeral de Pesca para participar no acto de lanzamento do proxecto de cooperación co goberno do país balcánico baixo o título: 'Maior desenvolvemento da lexislación pesqueira nacional'. O obxectivo é fortalecer a capacidade de xestión do Executivo serbio no ámbito do sector pesqueiro e acuícola en liña cos criterios e normativa comunitaria de cara a súa posible integración na Unión Europea.

A Xunta, como administración con competencias en pesca e acuicultura, participa compartindo a súa experiencia na regulación e xestión destas actividades entre as que se inclúe o procesado de produtos mariños así como o control e rastrexabilidade dos mesmos. Esta iniciativa, executada pola Fundación Internacional e para Iberoamérica de Administración e Políticas Públicas (FIIAPP), terá unha duración de 8 meses.

Este proxecto é un dos denominados 'twinning projects', que son instrumentos da Unión Europea para a cooperación institucional entre administracións públicas dos Estados membros da Unión e países beneficiarios ou socios. A finalidade é brindar apoio para a transposición, implementación e cumprimentos da lexislación comunitaria fortalecendo as capacidades das administracións públicas dos Estados beneficiarios ao longo do proceso de adhesión, dando como resultado avances progresivos e positivos nas súas respectivas rexións.

Galicia leva o seu modelo de xestión de pesca, acuicultura, control e rastrexabilidade de alimentos mariños a Serbia | Fonte: XUNTA