Un xulgado anula a adxudicación dunha praza de traballadora social en Monfero

O Xulgado do Contencioso-Administrativo número 2 da Coruña anulou a adxudicación dunha praza de traballadora social no Concello de Monfero, á vez que ordena que se refaga a valoración dos méritos dos candidatos. A sentenza, da que informa o sindicato USO, foi emitida o 31 de xullo e xa é firme. Nela, o maxistrado estima un recurso contra a resolución deste proceso de estabilización. O motivo é que "non sería computable ou valorable", durante o proceso, a experiencia laboral desta candidata como técnico de inserción sociolaboral no Consorcio Galego de Servizos de Igualdade e Benestar e na Universidade da Coruña (UDC).

"A interpretación realizada polo Tribunal da base que nos ocupa é contraria a dereito, pois as diferenzas entre traballador social e asistente social, dun lado, e técnico de orientación sociolaboral, doutro, son evidentes, non hai tal similitude, menos aínda equivalencia", subliña. Así, esta sentenza declara a nulidade do proceso e obriga ao Concello de Monfero a "emitir nova valoración dos méritos dos aspirantes ao posto de traballador social descontando a puntuación por experiencia laboral en postos que non son similares".