A Xustiza anula 50 multas das protestas das preferentes
Dos máis de 1.800 millóns de euros investidos no seu día, faltan por recuperar aproximadamente 100 millóns de 10.000 persoas, segundo datos da Plataforma de Afectados.
Por Galicia Confidencial | Santiago de Compostela | 05/01/2016 | Actualizada ás 14:00
Este martes está a celebrarase en Compostela o xuízo polo recurso presentado contra unha multa da Subdelegación do Goberno durante un acto de protesta dos afectados polas preferentes.
De acordo a Coordenadora Galega de Afectados por Preferentes e Subordinadas o incidente sucedeu "cando unha compañeira tentaba dirixirse ao expresidente de Uruguai, José Alberto Múgica, en visita oficial a Compostela, estando presente Feijóo, e co obxectivo de trasladarlle a problemática na que poderían estar inmersos galegos na emigración".
Segundo datos deste colectivo, a práctica totalidade das multas recorridas foron falladas a favor dos sancionados nos máis de cincuenta xuízos celebrados no último ano. A Plataforma de Afectados de Compostela reclama que se identifique aos autores das ducias de denuncias e multas impostas a membros das plantaformas "sen ningunha causa nin xustificación, como acreditan as perto de 50 sentenzas favorábeis ás persoas denunciadas". O valor das multas que a Xustiza declarou ilegal supera os 20.000 euros.
Malia que a maioría dos afectados xa lograron recuperar o seu diñeiro, o colectivo citado asegura que faltan por recuperar aproximadamente "100 millóns de 10.000 persoas espoliadas". A Plataforma de Compostela reclama a ABANCA e aos gobernos do PP no Estado e na Xunta que se depuren as responsabilidades económicas e penais dos autores desta estafa. Ademais, piden unha comisión de investigación no Parlamento.
