Por Galicia Confidencial | Ourense | 16/01/2016 | Actualizada ás 12:30
A empresa de moda Adolfo Domínguez segue sen levantar cabeza. A pesar dos ERE's, cambios na súa dirección e na súa orientación empresarial segue rexistrando perdas. Nos primeiros meses do ano fiscal --de marzo a novembro de 2015-- foron 16,6 millóns, un 61,2% máis que no mesmo período do ano anterior.
Segundo lle comunicou a compañía á Comisión Nacional do Mercado de Valores (CNMV), as vendas do grupo neste período reducíronse un 11,1%, até 72 millóns, mentres que as vendas en tendas comparables -sen ter en conta aperturas, peches ou reformas- caeron un 5,7%.
Segundo a compañía, esta situación xa quedou resolta durante a tempada de primavera-verán e foron debidas ao atraso nos prazos de entrega da mercadoría por varias "incidencias" na súa cadea de subministración, xurdidas durante o plan de reestruturación do grupo.
O resultado bruto de explotación (ebitda) recorrente tivo un saldo negativo de 10,4 millóns de euros de marzo a novembro, fronte aos 2,8 millóns de euros negativos do mesmo período en 2014.
A empresa achaca este dato negativo tanto ao descenso de vendas como ao peche de 23 tendas de marzo a novembro, dentro do plan de axuste de puntos de venda non rendibles para a téxtil.
A 30 de novembro, Adolfo Domínguez contaba con 324 establecementos en España e Portugal, 20 menos que a marzo de 2015 e 46 menos que os que tiña 12 meses antes. No resto de países, a compañía pechou o seu terceiro trimestre con 232 tendas, 3 menos que as que tiña en marzo.A débeda financeira neta da sociedade aumentou un 36%, pasando de 14,3 millóns de euros a 19,4.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.