Por Galicia Confidencial | Compostela | 25/01/2016 | Actualizada ás 14:20
O presidente da Xunta e do PP galego Alberto Núñez Feijóo, foi este luns un chanzo máis alá nas súas críticas a Podemos. Unhas críticas que fixo extensivo a todo o colectivo universitario e, en especial, ao dos profesores universitarios. “España non merece ver que o PSOE dependa e faga depender ao conxunto do país do que digan tres profesores de Ciencias Políticas", dixo en alusión aos dirixentes de Podemos.
Núñez Feijóo criticou o que está acontecendo entre a formación de Pablo Iglesias e o PSOE para a conformación dun goberno e criticou que en España non haxa unha segunda volta electoral como “na maioría dos países de Europa”. "Agora dependemos do que digan os profesores Monedero, Errejón e Iglesias. Ver ao PSOE depender e que faga depender a España do que digan tres profesores de Ciencias Políticas non o merece", dixo.
Na súa opinión, o PSOE, "tras 150 anos de historia, saberá que España é máis importante que o que poidan opinar tres deputados que non confían nas institucións nin no modelo constitucional español e que as sesións de investidura son moi serias e non se pode anunciar un goberno con ministros sen acudir a unha sesión de investidura", destacou
Suliñou que a situación actual nunca se produciu e advertiu de que se están tomando de broma as institucións, o pobo de España e a nación española" e que para iso "ninguén ten lexitimidade, nin Podemos, nin o PSOE nin os independentistas".
Antes de participar en Santiago nun acto no hospital Gil Casares, Núñez Feijóo tamén se referiu á decisión de de Mariano Rajoy de dar un paso atrás momentáneo e dixo que é "a única estratexia" que cabía tras ver ese mesmo día como un deputado da terceira forza con máis apoios se autoproclamase vicepresidente e mostrase aos seus ministros. Unha posición contraria a que mantiña un día antes de que Rajoy fixera ese anuncio.
Sen embargo, agora, Feijóo considera que "o lóxico" é que Mariano Rajoy fixese o que fixo e que o PSOE, "que se nega sistematicamente a falar con PP", presentase ao xefe do Estado a proposta da que xa se coñecen "vicepresidente e tres ou catro ministros". “Mariano Rajoy tomou unha decisión que implica "non tomarse a sesión de investidura de broma, respectar as institucións e a máis de 7,2 millóns de votantes do PP", engadiu.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.