Renuncia o edil que chamou “mala zorra” a Carmela Silva
Recoñece que as súas palabras foron “ofensivas e inadecuadas” e di que o fixo pola “frustración” de ver cancelado o rally das Rías Baixas pola falta de apoio da Deputación de Pontevedra.
Por Galicia Confidencial | Moraña | 03/02/2016 | Actualizada ás 19:12
“Mala zorra e sinvergüenza”. Estes foron os insultos que Jorge Caldas, tenente de alcalde en Moraña (Pontevedra), lle adicou á presidenta da Deputación de Pontevedra, Carmela Silva, na rede social Facebook, logo de que este organismo decidira reducir os orzamentos do rally Rías Baixas. Uns insultos que lle teñen costado a súa renuncia como concelleiro.
Caldas, curiosamente até a data responsable da área de Igualdade, anunciou que deixa o Concello de Moraña e pediu desculpas á socialista Carmela Silva. “Os meus foron termos ofensivos e inadecuados", dixo este martes nun comunicado remitido aos medios no que explicou que o contexto no que se produciu tal comentario foi o da "frustración" pola cancelación da proba automobilística.
"En todo caso nin para min nin para o meu partido, nin esta discrepancia nin ningunha outra xustifican o insulto persoal que proferín e, por iso, quixen acompañar as miñas desculpas dun xesto que evidencia o meu arrepentimento polo erro cometido", engade.
"Esas consideracións, ademais de ser inxustificadas e inxustificables, nin se corresponden cunha relación lóxica entre adversarios políticos, nin se corresponden coa miña opinión persoal acerca da señora Silva", recolle este comunicado.
Esta decisión prodúcese tan só un día despois de que a alcaldesa de Moraña, Luisa Piñeiro, suliñara que esas palabras non merecían a dimisión de Caldas e logo de que tanto o PSdeG como o BNG pediran a súa destitución e a da propia rexedora por defendelo. O PSdeG mesmo anunciou que pediría á Fiscalía que investigara estes insultos.
