Por M.V. | Lugo | 08/02/2016 | Actualizada ás 14:43
Lugo será a provincia máis disputada nas eleccións provinciais que ten en marcha o PP. Raquel Arias, apoiada polo aparato do PP galego e delegada territorial da Xunta, oficializou hoxe a súa candidatura. Competirá con Elena Candia, alcaldesa de Mondoñedo.
En ningunha outra provincia hai candidatos de tal calado. En Pontevedra e Ourense saldrán elixidos -salvo gran sorpresa- Alfonso Rueda e José Manuel Baltar sen oposición. Na Coruña hai dous candidatos, pero Javier Escribano é considerado -tras a súa arquivada imputación- como un outsider pola maioría do aparato.
En Lugo a competición é doutro calado. Candia, ademais de ser brevemente presidenta da Deputación tras a lea entre Bloque e PSOE, é unha persoa moi próxima a José Manuel Barreiro, o presidente que agora abandona o liderado do PP de Lugo.
Arias xa lle tirou unha pequena pulla a Barreiro esta mañá, cando se presentou na sede conservadora en Lugo para presentar a súa candidatura. A delegada da Xunta recordou que o presidente non formalizou a súa marcha até estes xoves, apurando os prazos. A política dixo que lle gustaría ter contado con máis tempo para presentar a candidatura. Arias botou a fin de semana recollendo apoios entre os alcaldes e finalmente logrou montar un equipo “non continuísta, pero aglutinador”.
En fronte terá a Elena Candia, quen leva tempo preparando a súa candidatura e quen xa venceu a competición por lograr a presidencia da Deputación mentres BNG e PSOE non chegaban a un acordo. Candia goza do apoio de pesos pesados na provincia, como o deputado da Mariña José Manuel Balseiro, o que en teoría lle outorga vantaxe. Agora ben, cómpre lembrar que o PP leva varios lustros sen pisar moqueta na Deputación e na capital da provincia, polo que a identificación de Candia co equipo anterior pode xogar na súa contra.
As eleccións do PP en Lugo tamén teñen unha lectura galega. No caso de que Feijóo salte finalmente a Madrid e deixe a presidencia do PPdeG, o núcleo ‘urbanita’ que o elevou ao liderado tras a era Fraga necesita da provincia de Lugo para evitar que dende Ourense o baltarismo poida planear algún tipo de alternativa.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.