Galicia sofre unha fuga de empresas que estanca a súa economía
Un informe alerta de que moitas empresas prefiren emigrar a outros puntos do Estado favorecendo a deslocalización. González Laxe advirte de que o país se está "afastando daquelas comunidades autónomas máis dinámicas" e se mantén "estancado" no 80% do PIB da media da UE.
Por Galicia Confidencial | Compostela | 08/03/2016 | Actualizada ás 17:48
Un total de 154 empresas deixaron Galicia no 2015 para trasladar o seu domicilio fiscal a outros puntos de España, mentres que só 135 emigraron doutras autonomías a Galicia. Un balance negativo que supón un estancamento da economía e un retroceso da converxencia do país co conxunto do Estado.
Son as conclusión dun informe divulgado este luns polo Foro Económico de Galicia que apunta, ademais, que até o 19 de febreiro deste ano, é dicir, nos primeiros 50 días do ano, decidiron marchar do país outras 19 empresas, fronte a 12 que quixeron instalar o seu domicilio fiscal aquí. Un balance negativo en 2015 que continúan, tamén, en 2016.
As empresas que emigraron de Galicia marcharon, fundamentalmente, a Madrid, Valencia, Andalucía, Cataluña e Castela-León, pero tamén ao norte de Portugal onde o chan, a enerxía, o salario e a presión fiscal son máis baratos. E é que outro informe precedente xa revelaba que os parques empresariais abundan en Galicia, pero carentes de empresas, polo que a rebaixa do prezo do chan, "aínda non é suficiente" para atraer ás empresas.
Por iso, e segundo este foro, Galicia está sufrindo unha fuga de capital como parte do proceso de "deslocalización", a pesar de ter un crecemento, soportado fundamentalmente polo consumo interno, que é insuficiente para poder converxer co resto de España e de Europa. Así, o catedrático de Economía Fernando González Laxe, expresidente da Xunta, critocou na presentación deste documento de que en Galicia “xa son máis o número de empresas que saen que as que entran”.
En todo caso, recoñeceu que a economía de Galicia creceu no último trimestres, polo que está "a saír dos efectos máis directos da crise" iniciada en 2007-2008, aínda que a súa expansión está por baixo da media de España. De feito, suliñou, este crecemento non é suficiente para alcanzar o do resto de España e destacou como especialmente "preocupante" que Galicia se está "afastando daquelas comunidades autónomas máis dinámicas", ademais de manterse "estancada" no 80% do PIB da media da UE.
E como actuar para erradicar esta situación?. A receita de Laxe pasa por actuar con políticas de "atractivas e de receptividade xeradoras de confianza". “É necesario seguir avanzando na rebaixa do prezo da enerxía, na achega de coñecemento e noutras medidas para evitar esa fuga, esa estampida de empresas”,
Ademais, o informe indica que Galicia rexistrou na primeira fase posterior á crise un crecemento do comercio exterior a consecuencia dos salarios baixos que permitiron mellorar as exportacións, incluído cara a países emerxentes, aínda que esa tendencia cambiou.
