Por Galicia Confidencial | Compostela | 12/03/2016 | Actualizada ás 18:33
José Ramón Besteiro perdeu a primeira gran batalla que libraba contra a xuíza Pilar de Lara. O líder dos socialistas galegos anunciou que non se presentará como candidato ás primarias que o PSdeG celebrará para elixir o candidato deste partido á Xunta, unha carreira á que, ata este sábado, non quería renunciar.
Perdeu a batalla, pero non a guerra porque Besteiro anunciou que seguirá como secretario xeral do partido, cando menos ata que se lle abra xuízo oral, que é o que estipula o código ético do partido. A súa intención e demostrar, como líder dos socialistas galegos, a súa inocencia e evitar que "unha xuíza o aparte da carreira política por intereses ocultos", segundo apuntou unha fonte da dirección socialista consultada por GC.
Besteiro reuniu de urxencia á Executiva do PSdeG este sábado para comunicarlle unha decisión que, previamente, consultou con Pedro Sánchez. E é que a súa segunda imputación nunha operación xudicial estaba xa afectando seriamente á credibilidade do secretario xeral do PSOE tras a insistencia de Ciudadanos de apartar ao líder dos socialistas galegos das vindeiras eleccións autonómicas.
Precisamente, a apertura de investigación contra el, dentro do marco da Operación Pulpo, que tamén investiga a xuíza Pilar de Lara, produciuse un día despois de que Sánchez o arroupara nunha visita que realizou a Coruña o pasado xoves. Por iso, a repercusión desta nova imputación foi aínda maior.
Besteiro, como xa dixo noutras ocasións, volveu criticar, precisamente, o momento no que se volve a actuar xudicialmente contra el, e criticou que, ao haber segredo do sumario, "non ten posibilidade de defenderse". As fontes consultadas destacaron que "está moi tranquilo" porque, ao igual que o outro caso no que está imputado, "está convencido de que vai sair impune".
Pilar de Lara decidiu investigalo como presunto autor de seis delitos e citouno o 11 de maio no xulgado. A xuíza impútalle os delitos de suborno, prevaricación, tráfico de influencias, fraude ás Administracións públicas, fraude de subvencións e delito continuado malversación de caudais públicos. É a segunda operación na que De Lara implica a Besteiro. A primeira foi a coñecida como operación Garañón, que investiga un presunto trato de favor nunha recualificación urbanística no Concello da Coruña cando el era concelleiro de urbanismo.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.