A CUT denuncia irregularidades na TVG

A maioría dos traballadores presentes e os mesmos promotores da revogación, cos que o Comité de Empresa non negociou en ningún momento as condicións do proceso, decidiron non exercitar o seu dereito ao voto para non lexitimar un procedemento que consideran que vulnera moitas das garantías que a lexislación prevé para a celebración deste exercicio democrático.

Varios traballadores presentaron ante as mesas reclamacións para denunciar posibles irregularidades, como que as mesas están compostas polos propios membros do Comité de Empresa obxecto de revogación, ou a imposibilidade dos traballadores da quenda de fin de semana de exercer o seu dereito ao voto pola premura coa que o Comité convocou as asembleas, con 48 horas de antelación, nunha manobra que a CUT considera descaradamente obstrucionista.

Os empregados e empregadas da canle autonómica que promoveron o proceso revogatorio van denunciar a obstrución e as posibles irregularidades do proceso nas instancias oportunas, esixindo as responsabilidades dos diversos implicados ata as súas últimas consecuencias.