Rueda destaca o valor da radio escolar como ferramenta educativa
Foi no marco dos Premios José Hermida.
Por E.P. | PONTEVEDRA | 09/05/2025 | Actualizada ás 16:11
O presidente da Xunta, Alfonso Rueda, participou no acto de entrega dos Premios José Hermida, promovidos polo Grupo Radio Pontevedra, onde puxo en valor o traballo desenvolvido polos alumnos e alumnas participantes e a importancia dos medios radiofónicos en situacións de emerxencia.
Esta é a primeira edición duns galardóns que recoñecen os mellores proxectos radiofónicos e podcasts realizados por alumnos de Infantil, Primaria e Secundaria de centros da provincia de Pontevedra. O titular do Goberno galego deu o "parabén" aos participantes e subliñou a importancia de iniciativas como esta, que fomentan o uso responsable da palabra e do son como ferramentas de comunicación e aprendizaxe. En concreto, remarcou que os mozos que se implicaron neste certame demostraron talento e puxo en valor "o traballo en equipo" de profesores e alumnos.
OPCIÓN PROFESIONAL
O presidente animou aos estudantes a continuar explorando esta como posible opción profesional nun futuro e aproveitou para lembrar o recente incidente do gran apagamento acontecido o pasado 28 de abril, durante o cal moitos cidadáns comprobaron a relevancia da radio como medio sempre dispoñible. Neste contexto, destacou a súa capacidade de acompañar e informar cando outros medios deixan de estar operativos.
