Por Galicia Confidencial | Santiago | 28/03/2016 | Actualizada ás 17:00
Hoxe hai 50 anos do pasamento do astrónomo, matemático e catedrático galego Ramón María Aller. Con motivo deste aniversario, a Universidade de Santiago de Compostela (USC) e a Secretaria Xeral de Política Lingüística co-editan o libro 'Astronomía a ollo ceibe’, primeira tradución ao galego da obra publicada en 1948 'Astronomía a simple vista'.
O novo volume foi presentado no Observatorio Astronómico da USC polo reitor Juan Viaño e o conselleiro de Cultura, Educación e Ordenación Universitaria, Román Rodríguez González. No acto participaron tamén o alcalde do Concello de Lalín, Rafael Cuíña; o secretario xeral de Política Lingüística, Valentín García; o concelleiro de Medio Ambiente e Convivencia do Concello de Santiago, Xan Duro; o director do Observatorio Astronómico Ramón María Aller da USC, José Ángel Docobo; e o director do Servizo de Publicacións e Intercambio Científico, Juan L. Blanco.
Pioneiro da astronomía galega
Ramón María Aller foi o iniciador da investigación astronómica en Galicia dende o seu observatorio particular en Lalín e logo como profesor de Matemáticas na USC, onde fundou e dirixiu o Observatorio Astronómico universitario que leva o seu nome e no que en 1945 se creou a sección de ‘Astronomía Teórica e Matemática Durán Loriga’ que co tempo sería o xermolo da Sección de Matemáticas da Facultade de Ciencias, da que Ramón Aller foi o primeiro catedrático. “O empeño do profesor Vidal Abascal, co firme apoio de Aller e Ferrín Moreiras, callou logo na creación da licenciatura en Matemáticas da universidade compostelá”, lembrou o reitor a USC.
Autor de varios libros e dunha longa lista de publicacións científicas en revistas especializadas, introdutor en España do estudo das estrelas dobres e director de cinco teses de doutoramento, observou desde o seu Lalín natal e máis tarde dende Compostela os máis diferentes fenómenos astronómicos, moitos de cuxos rexistros permanecen inéditos en numerosos cadernos de cúpula.
Especialista en debuxo, reloxería, deseño de instrumentación científica, Aller é lembrado non só polas súas múltiples achegas e facetas científicas, senón tamén pola súa humildade e entrañable personalidade.
Máis celebracións en Lalín
O Concello de Lalín tamén lle adica hoxe dunha ofrenda floral e a inauguración dunha exposición no Museo Provincial con fotos, traballos e instrumentos do científico dezano, ademais de dúas charlas de José Ángel Docobo e Cecilia Doporto; o primeiro, sobre a produción científica de Ramón María Aller e a segunda, sobre asopinións de quen o coñeceron.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.