Por Galicia Confidencial | Santiago | 07/04/2016 | Actualizada ás 10:41
Malia que a Xunta segue recurrindo aos datos macroeconómicos para vender a recuperación, o certo é que a realidade que viven os traballadores galegos contradí a versión oficial. A situación dos autónomos galegos é un bo exemplo de que a crise non rematou. Galicia liderou en 2015 as solicitudes de prestación por cese de actividade de autónomos en España. En concreto, o 23,9% do total das presentadas en todo o Estado durante o ano 2015 para recibir a prestación por cese de actividade rexistráronse no noso país, un total de 1.594 solicitudes, das que 1.043 se resolveron favorablemente e 410 resultaron desfavorables. Das 141 restantes, 37 aínda se atopan pendentes de resolución, mentres que 104 foron desistidas. Son datos da Federación de Organizaciones de Profesionales, Autónomos y Emprendedores (OPA), tomando como base os proporcionados pola Seguridad Social.
En total, 6.662 autónomos de toda España pediron a prestación por cese de actividade. Destas solicitudes, 5.098 foron reclamadas a través de mutuas colaborativas da Seguridad Social, mentres que 1.564 se presentaron no Instituto Social da Marina e Servicio Público de Empleo Estatal. E de todas elas, 2.935 foron resoltas favorablemente e 2.988 de forma desfavorable, mentres que 359 aínda están pendentes de resolverse e 380 foron desistidas. A maioría das solicitudes que foron desfavorables, en concreto 2.125, se deberon a que os autónomos non acreditaron correctamente o cese.
Tras Galicia, Andalucía situouse como a segunda autonomía con máis solicitudes de prestación por cese, cun total de 1.234. Logo, aparecen a Comunidad de Madrid, con 810, e Catalunya, con 571, e a Comunitat Valenciana, con 554.
Só entre as cinco primeiras comunidades que rexistraron máis solicitudes sumaron o 71,5% do total en toda España.
O presidente nacional de OPA, Camilo Abiétar, sinalou ao respecto que malia que en decembro de 2014 se aprobou unha nova lei para acceder á prestación por cese de actividade, “da análise de OPA observamos como case a metade das solicitudes que presentaron o ano pasado os autónomos para poder cobrar o paro, en concreto o 44%, foron denegadas en primeira instancia, polo que aínda é necesario que melloren as condicións para que os traballadores por conta propia solucionen este problema”.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.