O comité de empresa de Sogarisa defende a seguridade da planta das Somozas

O comité de empresa da Sociedade Galega de Residuos Industriais (Sogarisa) manifestou este luns que a planta de tratamento de residuos industriais das Somozas cumpre todos os requisitos de seguridade e protección ambiental vixentes, despois de que se alertase de casos de intoxicación na contorna e se suspendese parcialmente a actividade do centro.

Nun comunicado, os traballadores insistiron en que a instalación é unha infraestrutura pública posta a disposición dun concesionario pola Xunta, polo que afirman que non houbo cambios nin no funcionamento nin no persoal que opera a planta. "Se a planta é a mesma, os traballadores tamén, e non hai incumprimentos na Autorización Ambiental Integrada por parte da empresa", expuxeron.

O comité sinala que os profesionais que desenvolven o seu labor no centro "son os primeiros interesados en que se cumpran todas as garantías" e lembran que "tratar residuos industriais nunha planta especializada evita unha ameaza maior para o medio ambiente".

Así mesmo, defenden os seus postos de traballo, a súa seguridade e a súa saúde, asegurando que non teñen constancia de ningún traballador atendido por servizos médicos debido aos supostos casos de intoxicación. "Se houbese algún motivo de alarma, seriamos os primeiros en denuncialo", recalcan.

Polo momento, as autoridades ambientais manteñen aberta a análise da situación para determinar as posibles causas dos incidentes rexistrados na contorna da planta.