O PPdeG destaca que a nova lei de cooperativas favorecerá a modernización do sector

As deputadas do Grupo Popular Noelia Pérez e Cristina Campero destacaron este domingo que a futura lei galega de cooperativas representará un impulso á profesionalización e ao desenvolvemento económico do sector. Así o manifestaron durante unha visita á Sociedade Cooperativa de Explotación Comunitaria Antelana, situada no concello ourensán de Xinzo de Limia.

Segundo subliñaron as parlamentarias, esta normativa, aínda en elaboración, chega nun contexto favorable, coincidindo coa celebración do Ano Internacional das Cooperativas, o que consideran "o mellor momento para avanzar cara ao fortalecemento dunha fórmula empresarial que é clave na estrutura produtiva de Galicia".

Desde o Grupo Popular lembraron que en Galicia existen actualmente máis de 2.000 cooperativas, que xeran un volume de facturación superior aos 3.500 millóns de euros e un impacto social estimado en 850 millóns anuais. Nese sentido, Pérez e Campero insistiron na necesidade de fomentar o cooperativismo como unha fórmula democrática, redistributiva e socialmente sostible, con especial atención á promoción e información por parte dos axentes intermedios.

As representantes do PPdeG aproveitaron tamén para cuestionar a postura do BNG, ao que acusaron de "incongruente" por votar en contra, segundo explican, dunha emenda sobre cooperativas durante o debate do estado da autonomía que días despois respaldaron nunha comisión parlamentaria.

"Non é coherente rexeitar unha proposta que cinco días despois aceptas co mesmo contido", sinalaron as deputadas populares, reclamando un apoio estable e claro ao cooperativismo galego por parte de todos os grupos.

A nova lei, segundo fontes do PP, buscará adaptarse ás novas realidades do sector, incorporando medidas que favorezan a creación de emprego, a innovación no rural e a consolidación de proxectos cooperativos con vocación de permanencia.