O Grupo San José gaña 2,2 millóns tras as perdas de 2015
Con todo, as ganancias da empresa de Jacinto Rey son un 1,8% menos que un ano antes. Mellora, sobre todo, a división inmobiliaria.
Por Galicia Confidencial | Madrid | 13/05/2016 | Actualizada ás 11:14
O Grupo San José rexistrou un beneficio neto de 2,2 millóns de euros no primeiro trimestre do ano. Unhas cifras que alivian a mala situación que tivo que afrotnar o pasado ano con 'números vermellos' de 8,7 millóns no mesmo período do exercicio anterior.
Segundo informou este venres a compañía á Comisión Nacional do Mercado de Valores (CNMV), a cifra de negocios do grupo construtor e de servizos situouse en 132,5 millóns de euros a peche de marzo, un 1,8% menos que un ano antes. O 81% da facturación achegouna a actividade de Construción, os ingresos da cal avanzaron un 0,9% nos tres primeiros meses, ata os 107,7 millóns de euros.
Non obstante, o maior incremento porcentual das vendas rexistrouno a división Inmobiliaria de San José, cun crecemento dos seus ingresos do 37,5%, ata os 8,2 millóns de euros.
Pola contra, a actividade de Concesións e Servizos recortou as súas vendas un 40,4% no primeiro trimestre e a de Enerxía facturou un 16,5% menos.
O 60% da cifra de negocio do grupo achegouno o seu negocio internacional, con 79,2 millóns de euros en vendas, un 10,4% menos que no primeiro trimestre. O mercado nacional contribuíu cun 40% á facturación de San José, mostrando un crecemento interanual do 14,3%, ata 53,3 millóns de euros.
O resultado bruto de explotación (Ebitda) da compañía ascendeu a 10,4 millóns de euros ata marzo, un 27,9% menos que no primeiro trimestre de 2015, mentres que o resultado neto de explotación (Ebit) retrocedeu un 32,2%, ata sumar 9,1 millóns de euros.
