Tres de cada dez galegos ocupados traballaron polo menos dous ou máis sábados ao mes no 2024

Un 29,2 % dos galegos ocupados en 2024 traballaron dous ou máis sábados ao mes en 2024, mentres que un 20,3 % tivo que acudir ao seu posto como mínimo un domingo ao mes. Así se desprende das distintas variables recollidas da Enquisa de Poboación Activa (EPA) que publica este venres o Instituto Galego de Estatística (IGE), que asegura que o ano pasado o sector de estudos de Tecnoloxías da Información e Comunicación rexistrou a taxa de ocupación máis elevada, con case un 80 %. 

Pola contra, Artes, humanidades e linguas contabilizou a taxa de paro máis alta, cun 12,9 %. En concreto, o 40,3 % dos ocupados en Galicia o ano pasado tiña un nivel de estudos básico, mentres que o 12,6 % estaba formado en Mecánica, electrónica ou outra formación técnica, industria e construción.

"O sector do nivel de formación ten influencia nas variables do mercado laboral. Así, a poboación formada en tecnoloxías da información e as comunicacións conseguiu a taxa de actividade máis alta, seguida de servizos e de mecánica, electrónica e outra formación técnica", explica o IGE.

En cando a operar os sábados e os domingos, máis dun 34 % dos ocupados galegos tivo que traballar polo menos un sábado ao mes e un 20 % un domingo. Entre outros datos, dos case 940.000 asalariados en Galicia, 36.600 persoas foron contratadas a través dunha empresa de traballo temporal e 18.700 obtiveron o seu emprego actual coa mediación dunha oficina de emprego pública.