Vivenda Xa! dá un ultimato á Xunta, á que ve como "principal responsable" da "crise da vivenda" en Galicia

A Plataforma Galega Vivenda Xa! entregou este venres no Rexistro da Xunta de Galicia, á que sinala como "principal responsable" da "crise da vivenda", un escrito con demandas nestes ámbitos. Entre elas, inclúe a creación dun Banco Galego de Vivenda e a disposición de inmobles da SAREB como aluguer social.

En declaracións aos medios este venres, a portavoz da plataforma, Iria Nández, situou a vivenda como "unha das principais preocupacións da sociedade galega". "É un atranco para o desenvolvemento da vida das persoas e vemos que as autoridades non se están tomando con suficiente preocupación e con suficiente celeridade de medidas para atallar este problema", criticou.

Desta forma, representantes do colectivo fixeron entrega dunha serie de medidas "urxentes" ao Goberno galego para frear a "crise da vivenda", aínda que apuntan que a orixe do problema é "estrutural". Así, sinalan á Xunta como o "principal responsable" da actual situación e da "privación dun dereito fundamental".

Entre as principais medidas destacan a creación dun Banco Galego de Vivenda para aluguer social, a solicitude á SAREB da cesión das vivendas que ten dispoñibles en territorio galego para a súa inmediata posta a disposición en aluguer social e a creación de hipotecas públicas con intereses taxados.

Así mesmo, solicitan a creación de incentivos para que a vivenda baleira entre no mercado. Segundo recolle a plataforma, Galicia conta con máis de medio millón de inmobles desocupados, que supoñen un 28,8 % do total, "o dobre que en España". A este respecto, propoñen, por exemplo, programas de axudas para a rehabilitación dos pisos baleiros que non están en condicións de habitabilidade, "condicionadas a logo alugar esas vivendas a un prezo taxado".

ACCIÓN DO ESTADO E OS CONCELLOS

A pesar de que as medidas entregadas este venres están dirixidas á administración autonómica, tamén piden acción aos concellos e ao Estado no exercicio das súas respectivas competencias nesta materia. Por unha banda, solicitan ao Ministerio de Economía que ceda as vivendas da SAREB de propiedade pública --"algunhas delas con condicións para entrar a vivir"-- para a construción dese banco galego de vivenda. No caso dos municipios, ínstanlles a que soliciten a zona de mercado residencial tensionado e a regulación das Vivendas de Uso Turístico (VUT) a nivel local.

Concentración de Vivenda Xa! ante a Xunta, a 9 de maio de 2025 | Fonte: VIVENDA XA!