Fest Galicia, a nova marca da Xunta para o patrocinio de festivais de música

A Consellería de Cultura, Lingua e Xuventude publicou este luns no Diario Oficial de Galicia (DOG) a convocatoria anual de adhesión de festivais de música á marca FEST Galicia, o selo creado pola Xunta para agrupar eventos estratéxicos que difunden a imaxe da Comunidade como destino musical baixo criterios de calidade e sustentabilidade.

Para este ano, o Goberno galego reservou 350.000 euros a esta iniciativa, que se materializará na formalización de contratos de patrocinio con entidades privadas que organicen eventos destas características, con datas de celebración entre o 15 de xuño e o 30 de setembro. O prazo de solicitude permanecerá aberto desde este martes ata o día 2 de xuño a través da sede electrónica da Xunta.

REQUISITOS

Ademais da profesionalidade na súa xestión, os festivais que opten a esta convocatoria deberán formar parte da marca anteriormente, contar cun orzamento de execución na edición de 2024 superior aos 100.000 euros, pór á venda un mínimo do 95% das súas entradas ou estar adheridos ao programa Carné Xove.

Entre os requisitos da nova convocatoria de FEST Galicia, destaca tamén o incremento do número de propostas galegas en cartel, establecendo un mínimo de catro bandas ou solistas nos eventos patrocinados.

Festival adherido á marca FEST Galicia. | Fonte: XUNTA