O PSdeG acusa a Xunta de bloquear un centro de día en Ponte Caldelas por non competir con outro vinculado a un alto cargo

A deputada do PSdeG Pomba Castro acusou á Xunta de "bloquear" a instalación dun centro de día público nun inmoble da parroquia de Caritel, en Ponte Caldelas, para non competir con outro no mesmo municipio que é propiedade do irmán do xerente do Consorcio Galego de Servizos de Igualdade e Benestar, Perfecto Rodríguez. Fíxoo durante unha pregunta formulada este xoves na comisión de sanidade, política social e emprego do Parlamento galego, na que Castro lembrou que o Concello, gobernado polo PSOE, quere este segundo centro porque o actual, o cal o xerente do Consorcio autonómico "coñece ben" porque "leva o seu mesmo apelido", ten só 12 prazas.

Así, na liña do que demanda o goberno local, a deputada socialista levou á Cámara galega a creación destas novas instalacións nun inmoble en Caritel que consta de dúas vivendas adquiridas en 2008 que ían servir para dúas familias reacollidas desde o poboado do Vao, aínda que finalmente isto non chegou a ocorrer por presión veciñal. O xerente do Consorcio de Servizos de Igualdade e Benestar, que foi alcalde de Ponte Caldelas entre 2003 e 2015, non entrou nas acusacións relativas ao seu irmán, senón que se limitou a afirmar que as "características arquitectónicas" deste edificio "non o fan viable tecnicamente" para ser centro de día.

"Habería que demoler a construción actual e facer unha nova, algo que non tería ningún sentido", engadiu Perfecto Rodríguez, para suxerir ao Concello que destine as vivendas a familias en situación de vulnerabilidade ou de exclusión social. Así mesmo, o xerente replicou que o goberno municipal de Ponte Caldelas, a pesar desta petición, "non presentou ningún proxecto" a unha convocatoria que a Xunta acordou coa Federación Galega de Municipios e Provincias (Fegamp) que permitía rehabilitar diferentes inmobles para convertelos en residencias, centros de día e outros servizos desta tipoloxía.

O xerente do Consorcio Galego de Servizos de Igualdade e Benestar, Perfecto Rodríguez, na Comisión 5ª, de Sanidade, Política Social e Emprego do Parlamento de Galicia | Fonte: Europa Press