Confirmada a sentenza contra Navantia como responsable de vulnerar o dereito á liberdade sindical
O Tribunal Supremo considera probado que a empresa naval non facilitou aos sindicatos información crucial sobre a masa salarial autorizada polo Ministerio de Facenda para a negociación colectiva
Por Europa Press / Redacción | Ferrol | 23/05/2025 | Actualizada ás 13:58
O Tribunal Supremo (TS) confirmou a sentenza que declarou a Navantia responsable de vulnerar o dereito á liberdade sindical ao negarse a proporcionar información sobre as masas salariais autorizadas entre 2018 e 2021 aos sindicatos CC.OO., UGT-FICA e CIG.
A Sala do Social rexeitou o recurso de casación da empresa naval pública e mantivo a condena a indemnizar con 7.501 euro a cada sindicato (22.503 euro en total) e a entregar os datos requiridos, tal e como estimaba unha sentenza da Audiencia Nacional.
A xustiza considera probado que a empresa naval non facilitou aos sindicatos información crucial sobre a masa salarial autorizada polo Ministerio de Facenda para a negociación colectiva.
Neste sentido, os sindicatos argumentaban que esta información era fundamental para poder negociar de boa fe as condicións salariais e outros aspectos do convenio colectivo. A Audiencia Nacional e agora o Supremo danlles a razón e agora Navantia está obrigada a pór a disposición dos sindicatos as masas salariais presentadas ao Ministerio de Facenda e as resolucións que autorizan os incrementos salariais dos anos 2018 a 2021.
O Tribunal Supremo desestima os argumentos de Navantia, que alegou, entre outras cousas, que si facilitara información de maneira informal e que a información solicitada non era estritamente necesaria para a negociación.
Con todo, esta nova sentenza considera que a información solicitada era relevante para a negociación colectiva e que a forma na que Navantia supostamente facilitou certa información (presentacións en Power Point) non cumpría coa obrigación de proporcionar a información oficial requirida.
