O TSXG considera "disputa persoal" unha pelexa entre policías dentro dunha comisaría

O Tribunal Superior de Xustiza de Galicia (TSXG) anulou unha sanción imposta a un policía nacional por unha pelexa dentro de comisaría ao considerala unha "disputa privada". Explican que o alto tribunal estimou o recurso Contencioso-Administrativo interposto por un policía nacional contra a resolución de 8 de outubro de 2024 do director xeral da Policía pola que se lle impuxo unha sanción de suspensión de funcións durante 40 días por unha falta grave.

Na sentenza, os maxistrados explican que o axente foi condenado en sentenza firme por un delito leve, polo que para sancionalo "esíxese que a infracción penal dolosa cometida estea relacionada co servizo", á vez que engaden que "se a acción que se imputa está desconectada dese servizo e non dá lugar a ese prexuízo funcional, non concorre a esixida tipicidad".

A Administración, segundo consta no fallo, fai derivar ese elemento da relación co servizo porque as dúas persoas que se agrediron mutuamente en 2022 eran membros da Policía Nacional, os feitos tiveron lugar dentro do vestiario da comisaría e a inimizade existente entre os inculpados tiña a súa orixe nunha cuestión de tipo profesional.

A sección primeira da Sala do Contencioso-Administrativo do TSXG, con todo, subliña que "nin un nin outro estaban de servizo", así como que a disputa "non se iniciou por un motivo relacionado coa prestación de servizo".

En consecuencia, a Sala entende que o feito de que o enfrontamento tivese lugar nas dependencias policiais "constitúe unha circunstancia meramente accidental, como se deriva do feito de que con anterioridade xa se produciron encontróns na rúa entre un e outro".

Por iso, recalca que "se tratou dunha disputa puramente privada, sen relación algunha co servizo", e que os feitos acecidos "non están conectados coa relación de suxeición especial propia dos empregados públicos coa Administración, o que reforza a anterior conclusión de desvinculación co servizo".