A Xunta insta ao Goberno a rectificar o recorte de case 50 millóns de euros do Plan Corresponsables

O Consello da Xunta deste luns avaliou as consecuencias do recorte de fondos anunciado polo Goberno central e que distribúe ás Comunidades Autónomas do Plan Corresponsables, que ten como obxecto apoiar as necesidades de conciliación das familias e fomentar a corresponsabilidade entre mulleres e homes. Segundo o informe elaborado pola Consellería de Política Social e Igualdade, Galicia deixará de recibir este ano máis de 2,3 millóns de euros que xa tiña comprometidos para financiar actividades e servizos de conciliación de concellos, de Asociacións de Nais e Pais (Anpas) e de entidades de iniciativa social.

Segundo lembran nun comunicado, a semana pasada o Consello de Ministros aprobou reducir en case 50 millóns de euros o orzamento do Plan, pasando de 190 a 142,5 millóns de euros, o que no caso de Galicia supón diminuír de 9,3 millóns de euros a só 6,9 os fondos dispoñibles. "Este é un recorte do 25 % que a Xunta terá que asumir con fondos propios", destacan. O informe sinala que esta medida que adoptou o Executivo central, "sen preaviso e sen acordar", deixa ás comunidades "sen marxe de manobra, xa que os orzamentos do exercicio xa están comprometidos e as ordes de axuda próximas á súa resolución e publicación". Ante esta situación, Galicia presentou alegacións ao documento de acordo e abstívose na Conferencia Sectorial de Igualdade do pasado venres, do mesmo xeito que fixeron outras 15 comunidades, porque un voto negativo podería supor a perda de fondos.

Así as cousas, a Xunta insta de novo ao Goberno central a que reconsidere a súa decisión e que non diminúa o financiamento deste plan que o ano pasado beneficiou en Galicia a máis de 30.000 nenas e nenos e ás súas familias, que participaron en actividades de conciliación, como servizos de madrugadores, de comedor ou campamento, ademais de sensibilización en materia de corresponsabilidade e masculinidades igualitarias. Así mesmo, a través deste Plan, achegáronse recursos a 170 concellos, 60 Anpas e unha vintena de entidades de iniciativa social.

AXUDA A FEDERACIÓNS DE MULLERES RURAIS

Por outra banda, o Consello da Xunta deu luz verde á sinatura de catro convenios de colaboración entre a Consellería de Política Social e Igualdade e as federacións provinciais de mulleres rurais para impulsar a formación e o emprego de calidade nos coidados as nenas e nenos. O importe destes acordos suma 400.000 euros, a razón de 100.000 euros por cada un deles. O obxectivo é que as mulleres rurais poidan acceder a postos de traballo no sector dos coidados de menores de 16 anos, por exemplo: nos servizos de madrugadores e de comedor dos colexios ou nos campamentos de concellos, asociacións de nais e pais (Anpas) e entidades de iniciativa social.

A previsión é que máis de 2.300 mulleres participen ao longo deste ano en ao redor de 200 cursos que as federacións desenvolverán no catro provincias galegas a través destes convenios. Trátase de facilitar a inserción laboral neste sector, con especial atención ás maiores de 45 anos. Para a consecución deste fin é necesario que o Goberno central desenvolva o certificado que permita recoñecer a formación e experiencia laboral destas mulleres, un compromiso que está recollido no Plan Corresponsables posto en marcha no ano 2021, lembran.

CONVENIO CON COLEXIO DE PSICOLOXÍA PARA VÍTIMAS DE VIOLENCIA DE XÉNERO

Así mesmo, o Consello autorizou a renovación do convenio entre a Consellería de Política Social e Igualdade e o Colexio oficial de Psicoloxía de Galicia (COPG) para atender vítimas de violencia de xénero e sexual. O orzamento do acordo é de 460.000 euros, case un 20 % máis con respecto ao do ano pasado. A través desta colaboración, a Xunta pon á disposición das vítimas unha rede de profesionais da psicoloxía especializados na atención, co obxecto de axudalas no seu proceso de recuperación.

Así, o convenio financia unha quenda de garda, que presta atención psicolóxica, especializada e permanente, no momento da interposición da denuncia. Dispénsase tamén apoio a homes que desexan reconducir as súas actitudes violentas no ámbito familiar, mediante o programa 'Abramos o círculo'. Estímase que este ano se poidan beneficiar deste programa máis de 1.500 persoas, entre mulleres vítimas de violencia de xénero e as súas fillas e fillos menores, outras persoas do ámbito familiar e homes con problemas de control de violencia. Entre os anos 2009 e 2025 prestouse atención a un total de 13.592 persoas.

INTEGRACIÓN DE PERSOAS CON DISCAPACIDADE INTELECTUAL

Por último, a Xunta tratará de facilitar a integración das persoas con discapacidade intelectual coa incorporación de 28 persoas e a convocatoria doutras 54 prazas en catro procesos selectivos. Para iso, a Consellería de Facenda e Administración Pública conta coa colaboración de dúas federacións, a Federación Galega de Asociacións en favor das persoas con Discapacidade Intelectual (Fademga Plena Inclusión Galicia) e a Federación Galega de Institucións para Síndrome de Down (Down Galicia), para deseñar os procesos selectivos en función das circunstancias especiais das persoas aspirantes, así como para facilitar a adaptación e o desenvolvemento das funcións nos postos de traballo que pasen a ocupar, para o que, entre outras iniciativas, as federacións pon a disposición das persoas aspirantes unha persoa de apoio para as primeiras semanas de traballo. Ademais, unha vez finalizados os procesos e adxudicados os postos, pídese ás consellerías correspondentes a designación dunha persoa que guíe, oriente e acolla as novas incorporacións para facer máis sinxela a súa acollida e integración no novo posto de traballo.

Comedor escolar | Fonte: JCCM - Arquivo