Ulloa Viva pide ao Ministerio de Cultura un informe sobre o impacto de Altri no patrimonio do Camiño de Santiago

A Plataforma Ulloa Viva dirixiuse ao Ministerio de Cultura para solicitar informe sobre o impacto do proxecto de Altri nos bens declarados patrimonio da humanidade do Camiño de Santiago. A plataforma lembrou que, a pesar da Declaración de Impacto Ambiental (DIA) favorable, tanto os colectivos como os expertos manteñen unha "profunda preocupación" polo impacto da planta na Ruta Xacobea e sinalaron que a controversia xorde tras analizar o expediente administrativo e comprobar que ten "serias deficiencias na avaliación do impacto patrimonial sobre o Camiño".

Segundo sinalan desde Ulloa Viva "o informe da Dirección Xeral de Patrimonio Cultural (DXPC) da Xunta de Galicia baséase fundamentalmente en dous informes externos presentados pola promotora, sen que conste unha avaliación propia dos servizos técnicos da Consellería". Ademais, expoñen que estes informes externos recoñecen un impacto patrimonial, visual e paisaxístico "significativo" no Camiño de Santiago, e lembran que o Consello da Cultura Galega tamén alertou da deficiente avaliación do impacto patrimonial. "Ante a magnitude do risco, faise un chamamento urxente ás autoridades competentes para que se emita un informe de impacto exhaustivo e rigoroso sobre o Valor Universal Excepcional dos bens declarados Patrimonio Mundial-Camiño de Santiago, garantindo a protección deste legado cultural e espiritual inestimable", concluíron.

Manifestación na Pobra contra o proxecto de Altri e a Mina de Touro | Fonte: GC - Arquivo