Por gcdeportes | Pontevedra | 28/05/2016 | Actualizada ás 14:38
Outra volta campión de Europa. E de xeito contundente, con ampla vantaxe sobre o segundo clasificado. O pentacampión mundial Javier Gómez Noya proclamouse por cuarta vez na súa carreira campión de Europa na proba celebrada este sábado en Lisboa. O triatleta galego controlou en todo o momento a carreira, disputada sobre a distancia sprint, e sentenciou nos dez quilómetros a pé, confirmando que a súa preparación para Río’2016 vai por bo camiño.
Gómez Noya saiu da auga (1,5 quilómetros) entre os primeiros, e liderou a proba no segmento da bicicleta xunto a un grupo de 13 triatletas. Da segunda transición xa saiu liderando a proba, a carón de Dmitry Polyanskiy. Pero o triatleta ruso apenas puido aguantar tres quilómetros o ritmo do ferrolán, que axiña rachou a carreira e marchou en solitario, como lle gusta, cara ao triunfo final. Chegou á liña de meta cun tempo de 1h:49:30, con case corenta segundos de vantaxe sobre Dmitry Polyanski. Terceiro foi o suízo Andrea Salvisberg. Non estaban en Lisboa os que serán a priori os seus principais rivais nos Xogos de Río: os irmáns Brownlee, o francés Vincent Luis ou o mallorquino Mario Mola, líder das Series Mundiais en 2016.
Esta foi a segunda proba que disputou o campión galego este curso, tralo retraso na súa preparación por unha lesión e tras estrearse a fin de semana pasada no Gran Prix de Dunkerke, onde foi cuarto. A seguinte proba no calendario de Javi Gómez Noya, perfilado co único obxectivo de acadar o ouro o 18 de agosto en Río, será a proba das Series Mundiais en Leeds (11-12 de xuño).
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.