Por Galicia Confidencial | Ourense | 31/05/2016 | Actualizada ás 18:34
O Xulgado de Instrución número 3 de Ourense citou a declarar a tres novas persoas no marco da investigación aberta tras a denuncia presentada por unha muller contra o presidente da Deputación ourensana, Manuel Baltar, por supostamente ofrecerlle traballo a cambio de sexo.
A xuíza, segundo informa o Tribunal Superior de Xustiza de Galicia (TSXG), citou en calidade de investigado polos presuntos delitos de suborno e tráfico de influencias ao pai do presidente para o 8 de xuño.
O día 7 están citados en calidade de testemuñas o asesor xurídico da Deputación no momento dos feitos que se investigan e o representante dun hotel da cidade.
Nunha providencia notificada este martes, a maxistrada dá traslado tamén a Fiscalía para que se pronuncia sobre a declaración de causa complexa.
O pasado 13 de outubro, unha muller denunciou ante a Fiscalía de Ourense que Manuel Baltar lle ofreceu no ano 2010 "unha praza fixa" na institución provincial, que entón aínda dirixía o seu pai, José Luis Baltar, "ou mesmo noutro lugar", a cambio de sexo.
Recentemente, o político do PP declinou pronunciarse sobre que a titular do Xulgado de Instrución número 3, Eva Armesto, que o investiga por supostos delitos de tráfico de influencias e suborno, chamara tamén a declarar en calidade de investigado ao xefe de persoal da Deputación, José Luis Suárez.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.