A Unesco visitará en outubro a Ribeira Sacra no tramo final da candidatura a Patrimonio Mundial
Por E.P. | SANTIAGO DE COMPOSTELA | 12/06/2025 | Actualizada ás 17:06
O conselleiro de Cultura, Lingua e Xuventude, José López Campos, confirmou este xoves a visita en outubro á Ribeira Sacra de consultores da Unesco no tramo final da candidatura galega a Patrimonio Mundial, que será avaliada en xuño de 2026.
"Estamos convencidos do valor deste terriotiro e, por iso, confiamos en que alcance o merecido recoñecemento", defendeu o responsable autonómico, que transmitiu ademais as "boas sensacións" do Goberno galego. "Estamos, de novo, ante pasos chave aos que nos enfrontamos coa tranquilidade e seguridade que dá contar cunha candidatura madura, sólida e arroupada non só polo Goberno central, senón por toda a comunidade, veciñanza, axentes locais e institucións da zona", asegurou.
O conselleiro lembrou que a candidatura pon en valor que se está ante un territorio que abarca 26 concellos das provincias de Lugo e Ourense que posúen "un valor universal e excepcional". Precisamente, a proposta céntrase en atributos especiais para deixar constancia do seu carácter único, que van desde canóns e vales fluviais esculpidos pola auga ata o relevante do seu patrimonio hidráulico, con infraestruturas que chegaron aos nosos días desde a revolución tecnolóxica medieval con muíños, centrais ou saltos de auga.
A este respecto, fixo fincapé en que a candidatura presenta unha paisaxe construída co uso da auga "dunha maneira nova que non está presente aínda de maneira suficiente na Lista de Patrimonio Mundial".
