Educación apunta a "intereses" detrás das manifestacións do profesorado

O conselleiro de Educación, Ciencia, Universidades e FP, Román Rodríguez, enmarcou as manifestacións do profesorado dos últimos días no "dinamismo e interese" do propio colectivo, sinalando que "todos o fin de curso, igual que os inicios, adoitan ser momentos onde hai certo movemento no sistema educativo" e estas concentracións son "habituais", mentres reivindicou o "esforzo" da Xunta para "mellorar o sistema educativo" e a situación dos docentes.

En declaracións aos medios este xoves, Rodríguez recoñeceu que esta mellora "non se consegue facer toda á vez", pero pediu facer un exercicio de "reflexión" e observar como estaba a situación "non hai tanto tempo", así como ter "unha visión comparativa con outras comunidades".

"Sempre se poden mellorar, como en calquera profesión ou ámbito, pero Galicia fai un esforzo por apostar pola educación e porque o elemento vertebral da mesma, o profesorado, poida desenvolver as súas funcións da mellor forma posible", defendeu.

BUROCRACIA E DIÁLOGO

Cuestionado polas críticas dos docentes pola burocracia, o titular de Educación sinalou que é unha protesta "xeral" en toda España e culpou á Lomloe, "introducida polo goberno socialista", do aumento de trámites deste tipo.

Nesta liña, apuntou que a Administración autonómica leva "tempo buscando rebaixar os trámites burocráticos" dentro do proceso educativo, algo que xa se incluíu no acordo asinado con algúns sindicados o pasado ano, con medidas "tendientes a reducila".

Tamén explicou que traballan nun plan encamiñado a que o profesorado "faga o que ten que facer: ensinar e estar cos alumnos".

Ante as queixas por falta de diálogo, Rodríguez subliñou que os sindicatos manteñen "moitas reunións con directores xerais", con encontros formais e informais, polo que resaltou que hai "moito diálogo e colaboración", aínda que ás veces haxa "discrepancias".

"Temos a sorte de que podemos ter un contacto directo cos profesionais e iso complementa o traballo dos sindicatos, respectando o papel dos sindicatos, pero creo que si que hai un dialogo fluído", aseverou antes de puntualizar que "outra cousa" é que sexan capaces de "pechar moitos acordos".

FOLGA

Doutra banda, despois de que a CIG non descartase unha folga no inicio do próximo curso, o responsable autonómico apelou a esperar a ver "como evoluciona" e afirmou que "cada un é responsable dos seus actos".

"O dereito a folga constitucionalmente recoñecido e o que o fai ten que saber por que o fai e comunicarllo á sociedade, que ao final é quen paga aos profesionais do sistema educativo", resolveu.

O conselleiro de Educación, Román Rodríguez.. Xunta de Galicia | Fonte: Europa Press