O BNG pide ao Goberno recuperar os servizos ferroviarios entre Ferrol e Ribadeo
Néstor Rego afirma que “esta infraestrutura está obsoleta e necesita dunha modernización”.
Por Europa Press / Redacción | SANTIAGO DE COMPOSTELA | 27/06/2025 | Actualizada ás 16:30
O deputado do BNG no Congreso, Néstor Rego, rexistrou iniciativas en relación á supresión de conexións e redución de servizos ferroviarios na liña de ancho métrico --antiga FEVE-- que conecta Ferrol con Ribadeo e Asturias, pasando pola Mariña lucense. A formación nacionalista, segundo explicou nun comunicado, esixe, co obxectivo de mellorar a cohesión e a vertebración de Galicia, mellorar os servizos ferroviarios, a modernización da liña e o desenvolvemento dun mapa ferroviario.
A liña de ancho métrico "arrastra anos de falta de investimento", o que deriva no "desmantelamento paulatino" dos servizos que presta a liña. A pesar da súa potencialidade, detallou o BNG, tanto no plano da cohesión e vertebración de Galicia como para a conexión con Asturias e o norte do Estado, os sucesivos executivos estatais "apenas destinaron recursos para o mantemento da liña".
"Esta infraestrutura está obsoleta e necesita dunha modernización, dun parque móbil moderno e de servizos ferroviarios adaptados ás necesidades das persoas usuarias. Necesita, en definitiva, dun plan integral que permita convertela nunha conexión útil e eficaz para a mobilidade", defendeu Rego.
