Galicia ten 1.646 deportistas de alto nivel, dos que 680 son mulleres

O número total de deportistas galegos de alto nivel ascende a 1.646, dos cales 680 son mulleres, o 41 %; mentres que a cifra de homes é de 966 homes, o 59 %. Nun comunicado, a Xunta informou de que o Diario Oficial de Galicia publicou este venres a orde pola que se recoñecen ás persoas deportistas de alto nivel, alto rendemento, rendemento deportivo de base e vitalicias, persoas adestradoras ou técnicas, xuíces e árbitros, entre outros.

En concreto, ao redor do 77 % de todos os recoñecidos, 1.273 son deportistas galegos de alto nivel (522 mulleres e 751 homes). Ademais, hai 150 deportistas de rendemento deportivo de base (76 mulleres e 74 homes); 143 deportistas de alto rendemento (58 mulleres e 85 homes); 45 técnicos de alto nivel (cinco mulleres e 40 homes); 23 árbitros e xuíces (14 mulleres e nove homes); e 12 deportistas galegos de alto nivel vitalicios (cinco mulleres e sete homes).

Entre estes destacan Carlos Arévalo, Carlos Pérez 'Perucho', Teresa Portela e Cristian Toro (piragüismo), Támara Echegoyen, Nico Rodríguez e Sofía Toro (vela), Adi Iglesias (atletismo adaptado), Susana Rodríguez Gacio (paratríatlon), Chano Rodríguez (natación adaptada), Enmanuel Reyes (boxeo) e Juan Antonio Saavedra (tiro paralímpico). Ademais, entre todas as categorías están recoñecidos 51 deportistas galegos (17 mulleres e 34 homes) con diversidade funcional, o "número máis alto da historia".

O presidente da Xunta, Alfonso Rueda, na recepción aos 46 deportistas que participaron nos Xogos Olímpicos e Paralímpicos | Fonte: XUNTA - Arquivo