A Fiscalía pide ata oito anos de prisión para cinco persoas por tráfico de cocaína en Ourense
O grupo está acusado de introducir e distribuír máis de cinco quilos de droga na cidade entre 2022 e 2023
Por Europa Press / Redacción | OURENSE | 28/06/2025 | Actualizada ás 18:03
A Audiencia Provincial de Ourense celebrará a vindeira semana —os días 1, 2 e 3 de xullo— o xuízo contra cinco persoas acusadas dun delito contra a saúde pública por tráfico de drogas que causan grave dano. A Fiscalía solicita penas de entre seis e oito anos de prisión, ademais dunha multa de 1,5 millóns de euros, por un caso relacionado coa distribución de preto de seis quilos de cocaína na cidade de Ourense durante o ano 2022.
Segundo o relato do Ministerio Fiscal, o principal acusado —xa condenado en 2019 pola Audiencia de Ourense por un delito semellante— tería retomado a súa actividade ilícita en 2022, adquirindo cocaína para a súa posterior venda e gardándoa en varios garaxes de Ourense. Para organizar a distribución, contou coa colaboración doutros catro investigados, que asumiron diferentes roles no proceso.
Un deles, sen antecedentes penais, encargábase do transporte das sustancias, empregando para iso un coche con compartimentos ocultos. Outro membro do grupo, tamén sen antecedentes, asumía tarefas de distribución, mentres que un cuarto implicado viaxaba dende Galera (Granada), onde se localizaba a nave na que presuntamente se preparaba a droga.
O 9 de agosto de 2022, a policía sorprendeu dous dos acusados nun aparcadoiro dun supermercado en Ourense, mentres se intercambiaban unha bolsa de rafia entre dous vehículos. No seu interior, segundo indica a Fiscalía, había nove paquetes con 5.912 gramos de cocaína.
Na mesma xornada, os axentes rexistraron o domicilio da persoa encargada da distribución, onde atoparon diversos materiais relacionados coa manipulación e comercialización da droga: catro básculas, bolsas de envasado ao baleiro, unha máquina de contar diñeiro, sobres con cartos en efectivo, e incluso unha servilleta con restos de cannabis. Un mes antes, en xullo, esta mesma persoa fora vista nun dos garaxes empregados como almacén.
A droga atopada procedía dunha nave industrial en Granada, propiedade do quinto acusado, tamén con antecedentes penais, neste caso por unha condena por tráfico de estupefacientes ditada pola Audiencia de Alacante. Alí os investigadores acharon dinheiro e bolsas con restos de cocaína dentro dunha furgoneta.
O Ministerio Público reclama oito anos de prisión e inhabilitación para o sufraxio pasivo para os dous acusados con antecedentes, mentres que para os tres sen antecedentes solicita seis anos de prisión. Todos eles se enfrontan ademais ao pagamento dunha multa de 1,5 millóns de euros, con seis meses de prisión substitutiva en caso de impago.
O xuízo desenvolverase na sección segunda da Audiencia Provincial de Ourense, coa participación de avogados defensores e a previsión de que testifiquen axentes policiais e outros testemuños.
