Un terzo dos graos universitarios públicos galegos xa están completos
A titulación que pechou coa nota máis alta volveu ser o dobre grao en Matemáticas e Física pola USC.
Por Europa Press / Redacción | SANTIAGO DE COMPOSTELA | 08/07/2025 | Actualizada ás 19:28
Un terzo dos graos que ofertan as universidades públicas galegas --69 dun total de 194, o 35,6%-- xa están completos e non aceptan máis alumnos despois do primeiro chamamento á matrícula que realizou este martes a Comisión Interuniversitaria de Galicia (CiUG). A maioría das carreiras que xa están pechadas atópanse na Universidade de Santiago de Compostela (USC), con 51 --o 77,27% do total que oferta--. Na da Coruña (UDC), as que están ao completo son 18 --o 32,72%--.
Mentres tanto, na Universidade de Vigo (UVigo) aínda hai prazas libres en todos os seus graos, posto que ningún quedou pechado con este primeiro chamamento. Os alumnos que resultasen convocados nalgunha destas titulacións terá de prazo desde as 00.01 horas deste mércores ata as 23.59 horas do xoves para formalizar a matrícula. No entanto, aínda poden esperar a que en futuros chamamentos poidan ser convocados a outra titulación de maior preferencia, xa que haberá ata nove cortes ata o mes de outubro. O seguinte será o vindeiro luns, 14 de xullo. De todas as carreiras que xa están completas, a única de nova creación é a simultaneidade dos graos en Enxeñaría Informática e Ciencia e Tecnoloxía de Datos, que pechou cun 10,532.
VARIACIÓN NAS NOTAS
Dos 68 restantes, hai 33 cuxa nota de corte sobe e outras 35 nas que baixa con respecto ao ano pasado, aínda que en moitas ocasións apenas varían décimas ou centésimas. Por tanto, polo momento non se pode concluír que o novo modelo de exame da Proba de Acceso á Universidade (PAU) introducido este ano tivese moita influencia. A titulación que pechou coa nota de corte máis alta volveu a ser o dobre grao en Matemáticas e Física pola USC. O último alumno en entrar obtivo un 13,458 na PAU, polo que subiu con respecto ao 13,278 do ano pasado.
A segunda é Enxeñaría Informática e Matemáticas (13,113), tamén pola USC, aínda que neste caso baixou minimamente sobre o corte de hai un ano (13,188). No caso de Medicamento, o corte deste ano sitúase no 12,953, un tres décimas máis.
