PSdeG e PPdeG cruzan acusacións: “non me chega o período de sesións para falar dos casos de corrupción do PP”

O PSdeG e PPdeG cruzaron acusacións de corrupción nunha iniciativa parlamentaria dos socialistas --que será votada na sesión do mércores do pleno-- para reclamar máis medidas de prevención e transparencia. A deputada socialista Patricia Iglesias comezou a súa intervención cun recordo ao exconselleiro maior de Contas José Antonio Redondo, recentemente falecido, por impulsar a modificación da lei en 2015 para unha nova competencia de prevención da corrupción neste organismo.

Tras iso, subliñou que o PP é "o único partido da historia da democracia condenado por financiamento ilegal, durante 20 anos", onde "M. Rajoy foi proba de cargo" para unha "condena penal firme". Tamén lembra que Feijóo "chegou" a presidente do PP porque Pablo Casado denunciou que o irmán de Ayuso levou " comisións millonarias" en plena pandemia. Así, dixo estar coa "cabeza alta" porque: "Non todos somos iguais fronte á corrupción". Así, compara a actuación "contundente" do PSOE fronte ao "triángulo da vergoña" --en referencia a Ábalos, Cerdán e Koldo-- cun PP que "ampara" e "tapa" casos.

Censura que o PP mantén no cargo a 48 imputados en causas penais, polo que "leccións do PP xamais". Tamén denuncia que o 40% da contratación da Xunta é "a dedo", con "coincidencias" de "vínculos familiares" de Alberto Núñez Feijóo e "altos cargos do PP". Ademais, carga contra a "recuperación" de edís condenados por violencia de xénero. "O Goberno galego do PP non pode funcionar como unha rede de favores", resume, sobre o que define como un "goberno de amiguetes" e con "abrazos vergoñosos". A iniciativa busca "medidas reais e efectivas" fronte a portas giratorias e "lobbies" entre os que citou a Altri e Greenalia.

En fronte, Cristina Sanz (PP) dixo que lle foi "difícil" crer que o PSdeG se atrevese a presentar esta proposta "coa que está a caer" de "escándalos día tras día". Acusa ao PSOE de Pedro Sánchez de manter no cargo a 27 persoas imputadas. Sanz sostén que en Galicia hai unha "excelente saúde democrática", "a anos luz do que fan vostedes en Ferraz e en Moncloa, co apoio cómplice de Pontón". Garante que a comunidade galega é "impermeable" a estas cuestións que "afectan a outros gobernos". Mentres, Óscar Insua (BNG) fixo gala de que no BNG hai "cero condenados por corrupción" e mostra o apoio á proposta socialista, máis aló de que sexa unha "declaración de intencións".

O PP, EN CONTRA DUN CONSELLO DA MEMORIA

Por outra banda, o PSdeG defendeu outra proposición non de lei nesta xornada de tarde no Parlamento para instar á Xunta a constituír o Consello da Memoria Democrática de Galicia. O PPdeG xa avanzou a súa postura contraria nunha votación que terá lugar este mércores, 9 de xullo. Paloma Castro (PSdeG) alertou da "pasividade" da Xunta para cumprir coa Lei de Memoria Democrática, da que "lamentablemente Galicia permanece á marxe".

Bota en cara á Xunta unha inacción que identifica cunha aproximación a Vox. Pon de exemplo a falta do recoñecemento á memoria histórica en Meirás e a illa de San Simón, onde se autorizan actos para "bailar bachata". Luís Bará (BNG) recrimina que a política de memoria "non existe" en Galicia porque os populares "son a extrema dereita", segundo di, "ultra", "españolista", "racista" e "reaccionaria". Afea que, no canto de recuperar a memoria en Meirás, o Goberno galego do PP "subvencionou á familia Franco con 44.200 euros" para abrir o pazo.

En cambio, José Luís Ferro (PPdeG) asegurou que a política de memoria "non está abandonada nin desatendida" na Xunta, xa que "colabora" co Estado en exhumacións e cun convenio coa Universidade de Santiago. O popular refuga a proposta de crear un Consello da Memoria porque defende non "acumular organismo", senón "políticas que funcionen".

"O PP TOLERA E PREMIA" A CORRUPCIÓN

Na súa intervención, a deputada do PSdeG Lara Méndez comezou mencionando diferentes casos de corrupción que afectaron a membros do PP (Gürtel, Púnica, Lezo, Naseiro...). "Señora Prado, non me chega o período de sesións para falar dos casos de corrupción do PP", espetou. Neste punto, defendeu as diferentes formas de xestionar estas circunstancias de PP e PSOE: "A corrupción nin a negamos nin a toleramos. O PP toléraa e prémiaa".

Nesta mesma liña, o parlamentario do BNG Iago Tabarés, que tachou a iniciativa de "bastante sectaria e con altas doses de cinismo", instou aos populares a perseguir a corrupción en xeral, lembrando que en abril de 2026 "vaise a xulgar a Operación Kitchen, unha estrutura pública de fondos públicos para impedir o funcionamento da administración de xustiza". Tamén sinalou como "inaudito" que o PP tivese "12 ministros dun goberno que pasaron polo Supremo" e que un exsecretario xeral do PPdeG teña "máis anos de condena que deputados hai nesta Cámara".

Na quenda de réplica, Paula Prado (PPdeG) insistiu en que o actual Goberno central é "o máis corrupto da historia de España" e subliñou que esta iniciativa, rexeitada tanto por socialistas como por nacionalistas, serve para "retratalos".