A nº1 de C’s por Pontevedra non se desculpa por usar unha tarxeta de discapacitados falsificada
“Non son a primeira que lle poñen unha multa de tráfico” responde María Rey. A candidata di que está a recibir un “aluvión” de mostras de apoio dende o aparato de Ciudadanos por algo que di pertence a súa “vida privada”.
Por M.V. | Pontevedra | 16/06/2016 | Actualizada ás 14:46
O diario ABC informou hoxe que a candidata número 1 de Ciudadanos por Pontevedra falsificou unha tarxeta de discapacitados. De acordo a versión de José Luís Jiménez no diario conservador, María Rey foi denuncianda pola Policía Local tras unha denuncia cidadá.
A tamén concelleira na capital do Lérez, tería empregado fotocopias a cor da tarxeta de aparcamento do seu marido para poder aparcar no centro. Os presuntos feitos durarían polo menos catro meses e sucederon en 2014.
A Policia Local vixiou o seu automóbil durante varios meses e finalmente retirouno canda o do seu marido. Os axentes descubriron fotocopias dunha mesma tarxeta de minusválidos nos dous automóbiles. O orixinal, supostamente do Concello de Brión, nunca chegou presentarse, tampouco no preito contencioso administrativo no que a Xustiza ratificou a sanción imposta pola Policía Local.
Versión de María Rey
María Rey deu explicacións esta mañá, tras, segundo ABC, negarse a dar a súa versión cando foi consultada previamente á publicación da noticia. A concelleira non desmentiu os feitos, non pediu desculpas e vinculou o sucedido co xogo sucio propio das campañas”.
“Anteriormente de estar en Ciudadanos puxéronme unha multa e pagueina, a partir de aí , nunca falei da miña vida privada, e non o vou a facer agora”, declarou.
Rey interpreta que “hai medo a Ciudadanos e que queren desprestixiarme a min a nivel persoal pero o proxecto de Ciudadanos está por riba das persoas”. Cuestionada pola prensa en varias ocasións, a candidata esquivou pedir desculpa polos feitos.
A política parece que nin considera deixar o seu posto porque di que recibiu un “aluvión de mensaxes de apoio” dos coordinadores da campaña de C’s e mesmo dos meus compañeiros de corporación.
