Desde este venres os establecementos poden adherirse ao Bono Peixe
Para trocar os bonos e poder facer efectivos os descontos ás persoas usuarias, os comerciantes terán que descargar no seu móbil a aplicación BonoPeixe.
Por E.P. | SANTIAGO DE COMPOSTELA | 10/07/2025 | Actualizada ás 20:02
Os establecementos interesados en adherirse ao bono que lanza a Xunta para descontos na compra de peixes e mariscos frescos --hai máis de 1.600 posibles na comunidade-- poden adherirse a partir deste venres, 11 de xullo.
O Diario Oficial de Galicia (DOG) publica este xoves a orde que regula esta iniciativa que conta cun orzamento de 2,5 millóns de euros.
A descarga destes Bonos Peixe polas persoas usuarias realizarase na web www.bonopeixe.gal a partir do 28 de xullo. Os bonos terán formato dixital a través dun código QR e estarán dispoñibles para a súa utilización nunha aplicación que permita realizar pagos (Wallet ou similar).
Para trocar os bonos e poder facer efectivos os descontos ás persoas usuarias, os comerciantes terán que descargar no seu móbil a aplicación BonoPeixe.
No momento da compravenda, as persoas usuarias deberán mostrar o seu bono en formato código QR e facilitar o seu número de DNI ou NIE. Os comerciantes deberán conservar durante un prazo de cinco anos os documentos justificativos da aplicación do bono de face a actuacións de control.
Este bono poderá usarse a razón de cinco euros por semana --con descontos do 25% da compra de ata un máximo de cinco euros--, cunha acumulación do importe non gastado nas sucesivas semanas ata un máximo de 25 euros, que poderán gastarse ao longo dun total de 10 semanas ou ata que se esgote o crédito. A Consellería do Mar prevé mobilizar 10 millóns e beneficiar a 150.000 persoas.
