O fútbol gaélico chega ás festas de Ourense

O fútbol gaélico chega á programación das festas de Ourense. Como novidade deste ano, está a celebración do I Torneo Festas de Ourense de fútbol faélico, que terá lugar este domingo 26, a partir das 18.00 horas, no campo de fútbol-rugby do campus de Ourense. A cita, organizada polo Auriense FG, equipo creado pola Asociación Universitaria de Ciencias da Educación, conta coa colaboración do Servizo de Deportes da Universidade de Vigo e do Concello de Ourense.

A súa celebración servirá, apuntan os seus promotores, para dar un paso máis na difusión do puxante gaélico galego na cidade das Burgas. O I Torneo Festas de Ourense de fútbol gaélico contará con participación tanto feminina coma masculina. Ás 18.00 horas comezará o encontro entre os equipos femininos do Auriense FG e de Herdeiras de Dhais, de Lalín. Seguiralle ás 19.00 horas o partido masculino destes mesmos equipos.

Desde a organización animan a todas as persoas interesadas neste deporte, unha combinación de fútbol e rugby, a achegarse ás instalacións universitarias a coñecer esta modalidade deportiva e gozar cos encontros.

Culminación do curso

A celebración desta competición culmina todo un curso de actividades arredor do fútbol gaélico levadas a cabo dende AUCE, e que comezaron coa posta en marcha a finais do ano pasado de dous equipos de fútbol gaélico, o Auriense FG masculino, que xoga na segunda división da Liga galega, e o Auriense FG feminino, que xoga na división única, ademais de participar xogadores e xogadoras de ambos no equipo mixto Afiadoras. “Empezamos arredor de 15 persoas e agora xa somos máis de 40 nos adestramentos, arredor do 90% alumnado universitario”, destaca Millán Brea, xogador do equipo e membro da asociación universitaria promotora.

Co obxectivo de fomentar o deporte rei de Irlanda entre os ourensáns e tendo en conta a afección que xa existe na cidade por deportes afíns como o rugby (Campus Ourense ascendeu este ano a División de Honra B), o Auriense FG levou a cabo durante o curso académico diversas iniciativas, como unhas Xornadas Abertas de Fútbol Gaélico ou a organización da Copa Galega de fútbol gaélico a principios de maio en Xinzo de Limia.

Con esta traxectoria, decidiron este ano propor a celebración do I Torneo Festas de Ourense de fútbol gaélico, que finalmente se celebrará este domingo. O obxectivo é, subliñan os seus responsables, que os participantes se divirtan ao mesmo tempo que fomentan a práctica do exercicio físico, non a competición profesional.